د طالبانو کډوالو او راستنېدونکو چارو وزارت وايي، په یوه ورځ له زرو زیات کډوال د سپین بولدک له لارې په جبري توګه له پاکستانه راستانه کړل شوي دي. دغه وزارت وايي، په دغو کډوالو کې له بنده خوشې شوي تر ۱۸ کلو کم عمره دوه ماشومان هم شامل دي.
د طالبانو کډوالو او راستنېدونکو چارو زوارت نن چهارشنبه د (غوايي پنځمه) په خپله اېکس پاڼه لیکلي چې، تېره ورځ د کندهار سپین بولدک له لارې ۹۹۸ افغان کډوال په جبري توګه له پاکستانه راستانه شول.
دغه وزارت د کندهار سپین بولدک د سرحدي امریت په حواله خبر ورکوي، ۱۹۱ کورنۍ چې د غړو شمېر یې ۹۹۸ تنه کېږي تېره ورځ په جبري توګه د سپین بولدک له لارې هېواد ته راستې شوې.
همدارنګه یاد وزارت وايي، درې تنه نور هغه بندیان په دغو کډوالو کې راستانه شوي چې د پاکستان په زندانونو کې یې د بند موده بشپړه کړې وه راخوشې شوي چې له هغې ډلې دوه تنه یې له ۱۸ کلو کم عمره ماشومان دي.
یاد وزارت وړاندې وايي، دغه ماشومان یې په سیمه کې د (او ایم پي او) موسسې ته ورپیژندلي چې کورنۍ ته یې وسپاري.
د کډوالو وزارت وايي، تازه راستانه شوي کډوال یې د مرستو ترلاسه کولو په موخه د ملګرو ملتونو د کډوالو عالي کمېشنرۍ او د کډوالۍ نړېوال سازمان دفترونو ته ورپېژندلي دي.
د پاکستان حکومت داسې مهال د افغان کډوالو د اېستلو دویم پړاو پیل کړی چې، د کډوالو سازمانونو او ملاتړو ادارو له پاکستانه په جبري توګه د افغان کډوالو پر اېستلو نیوکې ډېرې کړې دي.
د پاکستان حکومت اعلان کړی چې د هغو نږدې نهه لکو افغان کډوالو د ایستلو لړۍ به د روانې اپرېل میاشتې له ۱۵مې وروسته پیلوي چې دوی ته د دغه هیواد حکومت د (افغان سټیزن کارډ) په نوم کارتونه وېشلي دي.
پاکستاني رسنیو راپور ورکړی، چې په وروستیو ۱۰ ورځو کې تر اوو زرو زیات افغان کډوال د وري میاشتې له ۲۵مې څخه د غويي تر درېیمې له پاکستانه ایستل شوي.
