د طالبانو پلاوي د تاتارستان له ولسمشر سره لیدلي دي
د طالبانو د سوداګرۍ او صنعت وزارت وايي، چې د کازان د غونډې په څنډه کې د طالبانو د صنعت او سوداګرۍ وزیر نورالدین عزیزي د تاتارستان له ولسمشر روستم مینیخانوف سره لیدلي دي.
د طالبانو د سوداګرۍ او صنعت وزارت وايي، چې د کازان د غونډې په څنډه کې د طالبانو د صنعت او سوداګرۍ وزیر نورالدین عزیزي د تاتارستان له ولسمشر روستم مینیخانوف سره لیدلي دي.
د طالبانو تر کنټرول لاندې د سوداګرۍ او صنعت وزارت نن چهار شنبه (د غويي ۲۶مه) په یوې اعلامیې کې ویلي، چې نورالدین عزیزي او ورسره مل پلاوي د تاتارستان د ولسمشر سربېره د دغه هېواد د سوداګرۍ له وزیر او د روسیې د اقتصادي پراختیا له مرستیال سره لیدلي دي.
په اعلامیه کې راغلي، چې په دې لیدنه کې دواړو لوریو پر دوه اړخیزو سوداګریزو مسایلو، کابل ته د تاتارستان د ولسمشر پر سفر، د برېښنا د تولید، کانونو په برخه کې د پانګونې، په افغانستان کې د روسیې د سوداګرۍ خونې پر جوړېدو او په دې برخه کې د عملي ګامونو په اړه خبرې شوې دي.
خبرپاڼه زیاتوي، چې په دې ناسته کې افغانستان او جنوبي اسیا ته د روسیې د توکو د لېږدولو په اړه هم خبرې شوې دي.
که څه هم د طالبانو حکومت د نړۍ هېڅ هېواد په رسمیت نه دی پېژندلی؛ خو له روسیې او ایران سره د طالبانو اړیکې د پخوا په پرتله لا پراخې شوې دي.
تېره ورځ د طالبانو دغه پلاوی د روسيې او اسلامي نړۍ پنځلسم نړۍوال اقتصادي فورم کې د ګډون لپاره تاتارستان هېواد ته تللی دی.
ټاکل شوې، چې د روسيې او اسلامي نړۍ پنځلسم نړۍوال اقتصادي فورم به د روانې میاشتې تر ۱۹مې نېټې پورې دوام وکړي.
