د طالبانو د قومونو او قبایلو چارو وزیر ملا نورالله نوري وايي، چې دا مهال په افغانستان کې له ۴۰۰ زرو څخه تر ۵۰۰ زرو پورې وسله وال طالبان لري، چې په نظامي ارګانونو کې ځای پر ځای شوي دي.
ملا نورالله نوري دغه څرګندونې نن چهارشنبه (د غويي ۲۶مه) د میدان وردګو د سېداباد ولسوالۍ د یوه جومات په پرانیست غونډه کې وکړې.
نوموړي وویل، چې لا هم د افغانستان ښارونو او کلیو کې د "غربیانو" کولتور او تقلید پاتې دی او باید پر وړاندې یې مبارزه وشي.
هغه زیاته کړه: " د غربیانو تقلید زهرجن دی او په هغه کې د الله تعالی عذاب او نارضايي ده".
ملا نوري پر خلکو غږ کړی، چې د اصحابو په څېر ژوند وکړي او د هغوی د ژوندانو اصول دې په خپل ورځني ژوند کې تقلید کړي.
نوموړي وویل: "که مو صورت او سیرت د اصحابو کرامو په ډول جوړ کړ په غرب کې به در څخه کافر ډاریږي او بل کافر او اشغالګر به ستاسو خاورې ته اراده نه کوي".
دا لومړی ځل نه دی، چې د طالبانو یو لوړ پوړی چارواکی د افغانستان د ښارونو او کلیو یو شمېر کولتورونه غربي تقلید بولي، بلکې له دې وړاندې د طالبانو د امربالمعروف وزیر، د لوړو زده کړو وزیر او ګڼو نورو لوړ رتبه چارواکو ورته څرګندونې کړې دي.
ملا نورالله نوري د طالبانو د وسله والو غړو شمېر په داسې مهال ورکوي، چې تر دې مهاله د طالبانو کورنیو چارو وزارت، دفاع وزارت او د استخباراتو ریاست په رسمي ډول د خپلو وسله والو په اړه دقیق ارقام نه دي وړاندې کړي.
