د بلوچستان په ژوب کې د ځايي خلکو او پوځ په ګډه جرګه کې د دې سیمې پر امنیتي حالت او د ډیورنډ کرښې پر اداره خبرې وشوې. د پاکستان دولتي راډیو وايي، په دې جرګه کې د ژوب او شېراني قبایلو مشرانو، ولسي او پوځي چارواکو او ځايي خلکو ګډون درلود.
ژوب د بلوچستان هغه سیمه ده چې له نږدې کال راهیسې پکې امنیتي پېښې ډېرې شوې او مسوولیت یې هم پر پاکستاني طالبانو غورځنګ اچول کېږي.
د افغانستان په یوشمېر ولایتونو کې د تازه سېلابونو پر دوام؛ یوازې په فاریاب کې د راوتلو سېلابونو له امله نهه کسه مړه شوي او اته نور تري تم دي.
په فاریاب کې د طالبانو د امنیه قومندانۍ مطبوعاتي دفتر د یوې خبرپاڼې په خپرولو سره ویلي، چې دغه سېلابونه د لولاش کوهستان ولسوالۍ په غرجي کلي کې راوتلي دي.
خبرپاڼه زیاتوي، چې په دغه سیمه کې د خلکو هرڅه په اوبو لاهو شوي او سېلاب ځپلي لومړنیو بېړنیو توکو ته سخته اړتیا لري.
طالبان وایي، چې د تلفاتو په شمېر کې د زیاتوالي احتمال هم شته.
ورته مهال په سرپل ولایت کې طالبان وایي، چې په کوهستاناتو ولسوالۍ کې سېلابونو د یوه ماشوم په ګډون څلور ښځې وړې دي.
په سرپل ولایت کې د طالبانو د والي ویاند حبیبالله سیمهییزو رسنیو ته ویلي، چې دغه سېلابونه تېره شپه په صوفک کلي کې راغلي، چې له امله یې ۱۵۰ کورونه او سلګونه جریبه کرنیزه ځمکه هم ویجاړه شوې ده.
له بل پلوه په بغلان ولایت کې د خوست ولسوالۍ لپاره د طالبانو ولسوال محمدثناء حقجو وایي، چې د بغلان ولایت په خوست ولسوالۍ کې سېلابونو یو کس مړ کړی دی.
د نوموي په وینا، دغه سېلابونو ۲۰۰ کورونه، ۵۰۰ جریبه کرنیزه ځمکه ویجاړه کړې او ۷۰۰ څاروي هم له منځه تللي دي.
په پنجشېر ولایت کې هم د سېلابونو د راوتو راپورونه لاس په لاس کېږي.
په پنجشېر ولایت کې د طالبانو د امنیه قوماندانۍ څخه په خپره شوې خبرپاڼه کې راغلي، چې په ابشار ولسوالۍ کې د سېلابونو راوتو له امله د دغې ولسوالۍ لاره تړل شوې؛ خو د تلفاتو او زیانونو په اړه یې څه نه دي ویلي.
تر دې دوه ورځې وړاندې پېښو ته د رسېدو په چاروکو کې د طالبانو وزارت ویاند ویلي و، په تېرو نږدې لسو ورځو کې په افغانستان کې د سېلابونو له امله ۲۹۴ کسان مړه شوي دي.
جانان سایق په یوې خبري ناسته کې زیاته کړې وه، چې د وروستیو سېلابونو امله شاوخوا ۱۵ زره کورونه وېجاړ شوي دي.
ښاغلي سایق ویلي، چې دغه مړینه روان کال د غويي له ۲۰مې د غبرګولې تر لومړۍ په بغلان، غور، تخار، فاریاب، بدخشان، سمنګان، بادغیس، بامیان او کاپیسا ولایتونو کې ځايي خلکو ته اوښتې ده.
د پاکستان د جمعیت علمای اسلام ګوند مشر د پاکستان پوځ ته په اشارې ویلي، چې له تېرو ۱۵ کلو راهیسې د ترهګرۍ پر ضد عملیاتو ترهګري لا زیاته کړې. مولانا فضل الرحمان دغه خبرې تېره ورځ د عمران خان ګوند له یوه پلاوي سره د خبرو پر مهال رسنیو ته کړې دي.
د جمعیت علمای اسلام ګوند تېره ورځ ناوخته د (غبرګولي دویمه) په ایکس پاڼه د دغه ګوند د مشر مولانا فضل الرحمان یوه ویډیو خپره کړې چې هغه د پاکستان تحریک انصاف ګوند له ورغلي پلاوي سره د خبرو پر مهال رسنیو ته وايي، «څو ورځې وړاندې د پاکستان پوځ په هوايي برید کې په وزیرستان عام خلک ووژل، خپله یې ومنله او بښنه یې وغوښته، دا څنګه ړانده عملیات دي چې یو ځل ولسي بې ګناه خلک وژنه بیا بښنه غواړه؟ دا ډول کړنې موږ ته د منلو وړ نه دي، او نه نور داسې حالت منلی شو.»
د تحریک انصاف ګوند یو پلاوی تېره ورځ مولانا فضل الرحمان ته د ګوندونو تر منځ د سیاسي اختلافاتو د کمولو په موخه ورغلي و.
مولانا فضل الرحمان له رسنیو سره د خبرو پر مهال ويلي، چې په چمن، انګور اډه، غلام خان او نورو سیمو کې پاکستانی پوځ د خلکو کارو بار ور خراب کړی او بېرته یې هغوی ته د ګټې وټط بله لاره نه ده برابره کړې، او هغوی چې هلته پرلت وهلی همداسې یې بې ځوابه پریښي دي.
هغه په دغه ويډیو کې وايي، چې په ډیورنډ فرضي کرښه چې کله انګریزانو دغه کرښه راکاږله دوه وروڼه یې سره بېل کړل، ځکه دوی یوه ژبه، یو دود و دستور لري. د یوه ورور کور یوې خوا او د بل بلې خوا پاتې شو، هغه پاکستاني پوځ ته په اشارې ویلي، نو ته څنګه دوی سره بېلولی شې، «دا هڅې ډیرو نورو واکمنو هم وکړې خو دغه خلک یې سره بېل نه کړل.»
مولانا فضل الرحمان داسې مهال ډیورنډ فرضي کرښې ته د فرضي کرښې نوم اخلي چې پاکستانیو چارواکو په دې وروستیو کې د رسنیو له لارې دغه کرښه یوه «نړېواله پوله» بللې.
په پاکستان کې یو شمېر سیاسي کتونکي وایي له هغه مهاله چې مولانا فضل الرحمان او د هغه پلویانو په وروستیو ټاکنو کې ماتې وخوړه، نو ورسره هم مهاله مولانا فضل الرحمان هڅه کوي چې د بېلابېلو سیاسي ډلو سره په نږدې کېدو د پاکستان په حکومت کې ځان ته د پښو کېښودو ځای پیدا کړي.
یوې پېژندل شوې افغان فلم جوړونکې د امریکا په متحدو ایالتونو کې د «فیمینسټانو له یوه بنسټ» نړیواله جایزه ترلاسه کړه. صحرا ماني له هغه وروسته د دې جایزې وړ وګڼل شوه چې د طالبانو په وړاندې د افغان ښځو د مقاومت مستند فلم «ډوډۍ او سره ګلان» یې سم انځور کړی و.
د فیمینسټانو یوه بنسټ د چهارشنبې په ورځ د غبرګولي دویمه په یوه خبرپاڼه کې وویل، چې تېره اونۍ یې په لاس انجلس کې د ښځو د حقونو د شپاړسمې کلنۍ جایزې ورکړې د مراسمو کوربتوب وکړ.
په دې مراسمو کې د نړۍ د ښځو د حقونو لپاره د ماویس لینو جایزه صحرا ماني او د «ډوډۍ او سره ګلان» مستند فلم ډلې ته ورکړل شوه. صحرا ماني ته دغه جایزه په امریکا کې د ټلویزیون د یوه پخواني ویاند جي لینو او د هغه د مېرمنې ماویس لینو، د دغه بنسټ د مدیره پلاوي غړو او د افغانستان د بشري حقونو خپلواک کمیسیون پخوانۍ مشرې ډاکټرې سیما سمر له خوا ورکړل شوه.
اغلې ماني په خپله ایکس پاڼه لیکلي چې د ډوډۍ او سره ګلان مستند فلم سره «زما هدف دا و چې د خپل هیواد د میرمنو مبارزه راتلونکي نسل ته ورسوم.»
هغې هیله څرګنده کړه چې که وکولای شي د افغان ښځو غږ پورته کړي او د دغه هېواد په بدلون کې برخه واخلي.
ډوډۍ او سره ګلان په کابل کې د طالبانو پر وړاندې د افغان ښځو د مقاومت کیسې ته یوه کتنه ده. دا فلم د دریو افغان میرمنو کیسه بیانوي او ښیي چې په ۲۰۲۱ کې د طالبانو له واک ته رسیدو وروسته د دوی ژوند څنګه بدل شو او دوی څنګه په زړورتیا سره د «جنسیتي توپیر» پر وړاندې ودریږي.
ډوډۍ او سره ګلان په ۱۴۰۲ کال کې د کانز په ۷۶وم نړېوال فستیوال کې ځانګړی نمایش درلود.
د اغلې ماني تر ځنګ، د متحده ایالاتو د کانګرس پخوانۍ استازې کارولین مالوني، او د نسایی ناروغیو متخصصه ډاکټر اسټین ډینارډ، ، د فیمینسټانو دغه بنسټ د ایوارډونو ورکړې وړ وپیژندل شوې.
د فیمینسټانو دغه بنسټ د ښځو د حقونو نړیواله جایزه هر کال یو لږ شمېر څېرو ته ورکول کیږي چې د ښځو او انجونو د حقونو په وده کې یې د پام وړ ونډه اخیستې او د هغو بې عدالتیو په اړه چې میرمنې د جنسیت له امله ورسره مخ دي د پوهاوي په لوړولو کې مرسته کړې وي.
د طالبانو د کورنیو چارو وزارت ویاند وایي، چې طالبانو د ۲۷ زره امریکایي ډالرو د قاچاق مخه نیولې ده.
مفتي عبدالمتین قانع د چهارشنبې په ورځ ( د غبرګولي دویمه) پر خپلې اېکس پاڼې لیکلي، چې یو تن یې چې غوښتل یې ۲۷زره امریکایي ډالر په ناقانونه توګه پاکستان ته قاچاق کړي د تورخم بندر شاو خوا کې نیولی دی.
همدا راز ښاغلي قانع وایي، چې د خوست امنیه قوماندانۍ امنیتي منسوبینو درې تنه چې غوښتل یې د پېسو په بدل کې یو کور ته لاسي بمونه وغورځوي نیولي دي.
ښاغلی قانع وویل: «له نیول شویو کسانو درې کړۍ لاسي بمونه ترلاسه شوي او د هغه کس د نیولو هڅې رواني دي چې دوی ته یې ددغه ناوړه کار لپاره پیسې ورکړې وې.»
د مدني فعال نور اغا ابراهیمي د کورنۍ یو غړي د نوم د نه ښودلو په شرط افغانستان انټرنشنل - پښتو ته وویل، چې نوموړی د کابل په خوشحال خان مېنه کې د طالب استخباراتو له خوا نیول شوی دی.
د سرچینې په خبره، چې نور اغا ابراهیمي نن چهارشنبه د کابل په خوشحال خان مېنه کې دوه بجې د طالبانو له خوا نیول شوی او نامعلوم ځای ته لېږدول شوی دی.
د طالبانو له خوا د کابل له نیولو لس ورځې وروسته نوموړی په کابل کې د لومړي ځل لپاره د طالبانو له خوا ونیول شو، چې وروسته بېرته خوشې شو.
پر نوموړي تور و، چې د احمد مسعود په مشرۍ د مقاومت جبهې لپاره کار کوي؛ خو له پلټنو وروسته بېرته خوشې شو.
نور اغا ابراهیمي دویم ځل لپاره یو ځل بیا د مقاومت جبهې سره د همکارۍ په تور د طالبانو له خوا ونیول شو، چې نېږدې څلور میاشتې وروسته بېرته راخوشې شو.
د نوموړي د کورنۍ غړي وايي، چې نن د درېیم ځل لپاره نوموړی د طالبانو د استخباراتو له لوري نیول شوی؛ خو تر اوسه یې ځای نه دی معلوم.
نور اغا ابراهیمي د جمهوریت پر مهال مدني او سیاسي فعالیت کاوه او د هغه پلار وصیل ابراهیمي د جمهوري دولت د لومړي مرستیال د مشاور په توګه دنده سرته رسولې ده.