د امریکا د ولسي جرګې د بهرنیو اړیکو د کمېټې مشر مایکل مک کال له افغانستانه د امریکايي ځواکونو وتل «وژونکي»، له ګډوډۍ او له «ناورین » ډک بللي دي. ښاغلي مک کال وویل چې دا وتل به د امریکا د نسلونو لپاره د دغه هېواد په بهرنۍ پالیسۍ کې داغ پاتې شي.
د امريکا د ولسي جرګې د بهرنيو اړيکو د کمېټې مشر دغه څرګندونې د امريکا د بهرنيو چارو له وزير انتوني بلينکن سره د دغې کمېټې د غونډې پر مهال وکړې.
د دغې کمېټې په خبرپاڼه کې د مایکل مک کال له قوله راغلي، چې له افغانستانه د امریکا له وتلو لږ وروسته روسیې د اوکراین پر پوله خپل ځواکونه ځای پر ځای کړل.
نوموړي په تېرو دوه نيمو کلونو کې د ځينو نړيوالو پرمختګونو په يادولو سره وويل: "هر څه د افغانستان له سقوط سره پيل شول."
د امریکا د ولسي جرګې د بهرنیو اړیکو د کمیټې د مشر په وینا، اوس "نړۍ په اور کې ده." د دغه امریکايي چارواکي په وینا، منځنی ختیځ د یوې بشپړې جګړې په درشل کې دی او چین پر تایوان د برید لپاره مانورې کوي.
ښاغلي مکل د بایډن پر ادارې نیوکه وکړه او ویې ویل: له افغانستانه د امریکا له وتلو وروسته دغې ادارې د نړۍ په سطحه خپله کمزوري وښودله.
هغه زیاته کړه، «سره له دې چې د ولسمشر له ژمنې سره سره چې ټول به یې وباسي، موږ اوس پوهیږو چې تر ۱۰۰۰ زیات امریکایان او نږدې ۲۰۰ زره افغان ملګري شاته پاتې دي.»
شاوخوا دوه ورځې وړاندې د امریکا د استازو جرګې د بهرنیو اړیکو د کمېټې مشر پر طالبانو د امریکا د نغدي مرستو کارول د منلو وړ نه بولي. مایکل مک کال د بایډن له حکومته وغوښتل، چې طالبانو ته د امریکايي مالیه ورکونکو د پیسو د انتقال د مخنیوي لپاره سمدستي اقدامات وکړي.
دغه راز د طالبانو د کورنیو چارو وزارت ویاند هم په خپل اېکس کې لیکلي، چې د قطر د دولت وزیر او بهرنیو چارو مرستیال وزیر په مشرۍ پلاوي له سراج الدین حقاني سره په کتنه کې ویلي، چې د دواړو هېوادونو ترمنځ د دوه اړخیزو سیاسي او اقتصادي اړیکو پراختيا غواړي.
په دغه دوو جلا جلا کتنو کې دواړو طالب چارواکو په هېواد کې د وروستیو سېلابونو له زیانمنو سره د قطر د بیړنیو مرستو هرکلی هم کړی.
د قطر د بهرنیو چارو وزارت د مرستیال او د دغه هېواد د دولت د وزیر په مشرۍ پلاوی د دوحې غونډې په درشل کې کابل ته تللی دی.
دغه پلاوي نن له ملا عبدالغني برادر او عبدالسلام حنفي سره هم لیدلي دي.
که څه هم د طالبانو امنیتي او دفاعي چارواکو په خپلو اعلامیو کې د دوحې غونډې په هکله څه اشاره نه ده کړې، خو د طالبانو د ریاست الوزرا د اقتصادي مرستیال دفتر وايي، د قطر د بهرنیو چارو مرستیال وزیر له دې ډلې د دوحې دریمه غونډه کې د ګډون غوښتنه کړې ده.
د طالبانو د اعلامیې له مخې، د قطر د بهرنیو چارو مرستیال وزیر دا هم ویلي چې د طالبانو ګډون سره به دا غونډه یوه نتیجه ولري.
په مقابل کې ملا برادر ویلي، چې د دوحې غونډه د دوی له ګډون پرته نتیجه نه لري.
ټاکل شوې، چې د دوحې دریمه غونډه اوه ورځې وروسته د قطر پلازمېنه کې پیل شي.
ملګرو ملتونو ویلي دي، چې د دې غونډې موخه «له افغانستان سره په منظم ډول د نړیوالو اړیکو زیاتول دي.»
د قطر تر پلاوي مخکې د ملګرو ملتونو د سرمنشي مرستیالې روزمیري ډي کارلو کابل ته د سفر په ترڅ کې طالب چارواکو ته د دوحې غونډه کې د ګډون بلنه ورکړې ده.
د یادولو ده، چې طالبانو په دغه غونډه کې د ګډون په اړه څه نه دي ویلي، خو په تېره غونډه کې یې ګډون ونه کړ.