د ملګرو ملتونو د بشري مرستو د همغږۍ ادارې چارواکې اېډیم وسورنو وایي، د افغان ښځینه کارکوونکو پر وړاندې د طالبانو لهخوا لګول شوي بندیزونو په افغانستان کې د بشري عملیاتو لپاره پېچلتیاوې زیاتې کړې دي.
نوموړې دغه څرګندونې په نیویارک کې خبریالانو ته کړې او زیاته کړې یې ده، چې شاوخوا ۱.۴ مېلیونه ښځې او نجونې لاهم له زدهکړو بې برخې پاتې دي.هغې وويل:« د بشري مرستو د رسولو پر مهال، زموږ زړورې افغان ښځينه همکارانې له ډېرو ننګونو سره مخ دي او هره ورځ د کار پر مهال له ګواښونو سره مخامخېږي.»هغې همدارنګه ویلي، چې ورته مهال د دوی همکاران د دغې موضوع په اړه له طالب چارواکو سره خپلو خبرو اترو ته دوام ورکوي.اغلې وسورنو وایي، چې څه موده وړاندې د خپل څلور ورځني سفر په ترڅ کې د طالبانو د اقتصاد او بهرنیو چارو وزیرانو په ګډون له بېلابېلو جګپوړو طالب چارواکو سره یې د دغو بندیزونو په اړه خبرې کړې دي.هغې وویل:« دا زما د پیغام رسولو یوه غوښنه برخه وه، افغان مېرمنې کار کولو ته اړتیا لري او دا اړینه موضوع ده.»هغه طالبانو ته په خطاب کې وایي:« په هره کچه تاسو اړتیا لرئ، چې دغه محدودیتونه لرې کړئ؛ ځکه چې موږ اړتیا لرو د پوهنې او روغتیا په برخه کې خپله دنده ترسره کړو.»هغې زیاته کړې، تر دې دمه د افغانستان لپاره د ۳.۶ مېلیارد ډالرو د مرستې له غوښتنې یوازې ۱۶ سلنه یې تر لاسه شوې ده.هغه وایي، په ټولیز ډول اوسمهال په افغانستان کې ۲۳ مېلیونه خلک په بشري مرستو تکیه دي او له ۱۵ مېلیونو څخه ډېر کسان د خوړو ناخوندیتوب سره مخ دي.د هغې په وینا، د افغانستان په مرکزي او شمالي سیمو کې وروستیو وژونکو سېلابونو د خلکو کړاوونه نور هم زیات کړي دي.
دغه راز د طالبانو د کورنیو چارو وزارت ویاند هم په خپل اېکس کې لیکلي، چې د قطر د دولت وزیر او بهرنیو چارو مرستیال وزیر په مشرۍ پلاوي له سراج الدین حقاني سره په کتنه کې ویلي، چې د دواړو هېوادونو ترمنځ د دوه اړخیزو سیاسي او اقتصادي اړیکو پراختيا غواړي.
په دغه دوو جلا جلا کتنو کې دواړو طالب چارواکو په هېواد کې د وروستیو سېلابونو له زیانمنو سره د قطر د بیړنیو مرستو هرکلی هم کړی.
د قطر د بهرنیو چارو وزارت د مرستیال او د دغه هېواد د دولت د وزیر په مشرۍ پلاوی د دوحې غونډې په درشل کې کابل ته تللی دی.
دغه پلاوي نن له ملا عبدالغني برادر او عبدالسلام حنفي سره هم لیدلي دي.
که څه هم د طالبانو امنیتي او دفاعي چارواکو په خپلو اعلامیو کې د دوحې غونډې په هکله څه اشاره نه ده کړې، خو د طالبانو د ریاست الوزرا د اقتصادي مرستیال دفتر وايي، د قطر د بهرنیو چارو مرستیال وزیر له دې ډلې د دوحې دریمه غونډه کې د ګډون غوښتنه کړې ده.
د طالبانو د اعلامیې له مخې، د قطر د بهرنیو چارو مرستیال وزیر دا هم ویلي چې د طالبانو ګډون سره به دا غونډه یوه نتیجه ولري.
په مقابل کې ملا برادر ویلي، چې د دوحې غونډه د دوی له ګډون پرته نتیجه نه لري.
ټاکل شوې، چې د دوحې دریمه غونډه اوه ورځې وروسته د قطر پلازمېنه کې پیل شي.
ملګرو ملتونو ویلي دي، چې د دې غونډې موخه «له افغانستان سره په منظم ډول د نړیوالو اړیکو زیاتول دي.»
د قطر تر پلاوي مخکې د ملګرو ملتونو د سرمنشي مرستیالې روزمیري ډي کارلو کابل ته د سفر په ترڅ کې طالب چارواکو ته د دوحې غونډه کې د ګډون بلنه ورکړې ده.
د یادولو ده، چې طالبانو په دغه غونډه کې د ګډون په اړه څه نه دي ویلي، خو په تېره غونډه کې یې ګډون ونه کړ.