د طالبانو د کورنیو چارو وزارت ویاند وایي، چې د بغلان ولایت د وروستیو سېلابونو له قربانیانو سره یې د یو نیم مېلیون افغانیو او ۸۰ زره امریکایي ډالرو په ارزښت نغدي مرسته کړې ده.
عبدالمتین قانع په اېکس پاڼه کاږلي، چې د دغه سفر په لړ کې یې څه باندې یونیم مېلیونه افغانۍ او ۸۰ زره امریکايي ډالر د ملي پانګهوالو او بنسټونو نغدي مرستې په اړمنو خلکو وېشلې دي.
د هغه په وینا، د دغو مرستو یوه برخه د ګذرګاه نور ولسوالۍ پر سېلاب ځپلو وېشل شوې ده.
له بل پلوه د مرستو د وېش په برخه کې خلک له طالبانو ناراضه دي.
په غور ولایت کې سېلاب ځپلي شکایت کوي، چې طالبانو لا هم ورسره مرسته نه ده کړې.
د ښځو د شنبههای ارغواني غورځنګ هم د یوې خبرپاڼې په خپرولو سره وړمه ورځ ادعا کړې وه، طالبانو په وروستیو کې د هغو حسابونو له لارې چې دغې ډلې رامنځته کړي له مرستندوبه بنسټونو غوښتي چې په افغانستان کې له سېلاب ځپلو سره مرسته وکړي.
دغه غورځنګ وایي، دغه وړاندیز داسې مهال کېږي چې نږدې درې کاله کېږي دغه ډله د مالیې، عشر او زکات په نوم له خلکو پېسې ټولوي، ټول کورني عواید په لاس کې لري، هره اونۍ له امریکا د بشري مرستو په نوم څلوېښت مېلیونه ډالر ترلاسه کوي؛ خو لا تراوسه یې له سېلاب ځپلو سره پام وړ مرسته نه ده کړې.
