د افغانستان لپاره د امریکا ځانګړی استازی ټام وېسټ د دوه ورځیني سفر له پاره انقرې ته رسېدلی دی.
هغه د دغه سفر په لړ کې له یوشمېر ترکي چارواکو سره د افغانستان په اړه خبرې اترې کړې دي.
هغه په اېکس پاڼه لیکلي، چې په انقره کې یې د دوو ارزښتمنو ورځو په لړ کې په افغانستان کې د شته ستونزو او ننګونو په ګډون د ټولییزې دیپلوماسۍ پر اړتیا، د داعش-خراسان ګواښونو پر وړاندې همغږو هڅو، د افغانستان په شمال کې د مرګونو سېلابونو او ناورینونو وروسته له خلکو سره د مرستو او د افغانانو له بشري حقونو د ملاتړ په اړه یې د ترکیې له سفیر اوزان ارطغرل او نورو ترکي چارواکو سره خبرې کړې دي.
نوموړي په دغه لیکنه کې د افغانستان د خلکو ملاتړ په برخه کې د ترکیې له هڅو مننه کړې ده.
هغه تر دې سفر وړاندې په متحده عربي امارتو کې هم د افغانستان په اړه له عرب چارواکو سره غږیدلی و.