د ماشومانو د ژغورنې سازمان وړاندوينه کړې، چې په ۲۰۲۴ کال کې شاوخوا ۶.۵ میليونه افغان ماشومان د لوږې له بحران سره مخ دي.
دغه سازمان ویلي، چې د نړۍ هېوادونه باید په افغانستان کې د ماشومانو د ژوند د ژغورلو لپاره بشري مرستې زیاتې کړي.
د ماشومانو ژغورنې سازمان د دوشنبې په ورځ (د غبرګولي ۷مه) لیکلي، چې سېلابونه، وچکالي او د افغان کډوالو راستنېدل په افغانستان کې د خوړو د نه خوندیتوب د زیاتوالي لاملونه دي.
د معلوماتو له مخې؛ تر پنځو کلونو کم عمره دوه میلیونه ماشومان په ډېرې خوارځواکۍ اخته دي.
په افغانستان کې د ماشومانو د ژغورنې سازمان مشر ارشد مالک وايي؛ د روان کال له پیله تر اوسه د څه باندې ۷زره خوارځواکو ماشومانو درملنه شوې ده.
هغه د افغانستان په شمال کې د وروستیو سېلابونو تر څنګ لوږه د افغانستان په لویو برخو کې د «ماشومانو لپاره خطرناک حالت» وباله.
مالک وويل، چې دوی په بغلان کې يو «ګرځنده کلينيک» جوړ کړى دى.
په دې کلینیک کې نارینه او ښځینه ډاکټران، د رواني روغتیا متخصصين او د ماشومانو د ساتنې کسان کار کوي.
هغه وويل، «په سېلاب ځپلو سيمو کې ماشومان پاکو اوبو ته محدود لاس رسی لري او يو شمېر يې د معدې ناروغي لري.»
دې سازمان ته یوه مراجعه کوونکي وويل: «ډېر وختونه موږ د خوړلو لپاره کافي خواړه نه لرو، زه غمجن یم کله، چې زما ماشومان وږي وي.»
هغه وویل، چې ځینې وختونه دوی په لوږه ويده کيږي.