په میدان وردګ ولایت کې د طالبانو د رسنیو دفتر په دغه ولایت کې د ښځو د سوداګرۍ او صنایعو خونې د پرانیستلو خبر ورکړی.
دغه دفتر د دوشنبې په ورځ (د غبرګولي ۷مه) د یوې خبرپاڼې په خپرولو سره ویلي، چې دا لومړی ځل دی په دې ولایت کې د ښځو د سوداګرۍ او صنایعو خونه پرانیستل کیږي.
د خبرپاڼې له مخې؛ دا خونه د افغانستان د ښځو د سوداګرۍ او صنایعو عمومي خونې له خوا پرانیستل شوې ده.
د دغې خونې مرستیالې فریبا نوري په دې اړه جوړه شوې غونډه کې د وینا پرمهال ویلي؛ میدان وردګ شلم ولایت دی، چې د دې خونې د خصوصي سکتور په چوکاټ کې خپل فعالیت پیلوي.
د یاد ولایت د طالبانو د اقتصاد رییس عبدالحکیم حامد بیا په خپلو خبرو کې د ښځو له سوداګرۍ څخه د طالبانو د ملاتړ ډاډ ورکړ.
نوموړي زیاته کړې ده: "میدان وردګ یو زراعتي ولایت دی او د ښځو لپاره د سوداګرۍ او صنایعو په برخه کې د دې څانګې پرانیسته خورا اړینه او ګټوره ده."
اخوا په دې ولایت کې د طالبانو د صنعت او سوداګرۍ خونې مسوولان وایي، چې په دې ولایت کې ډېرې ښځې د لاسي صنایعو، د لبنیاتو د پروسس، د روب او مربا جوړولو په برخو کې په دندو بوختې دي.
دا خونه په داسې حال کې پرانیستل کیږي، چې د مرکز کابل په ګډون د هېواد په ټولو ولایتونو کې سوداګرې مېرمنې له بېلابېلو ستونزو سره لاس او ګرېوان دي.
یو شمېر سوداګرې ښځې بیا د ښځو د سوداګرۍ خونې فعالیتونه هم بې ګټې بولي او وایي، چې یاده خونه د واسطو په اساس کار کوي.
د ویلو ده، چې نړۍوال بانک په ۲۰۲۳ کال کې ښځې، تجارت او قانون' تر عنوان لاندې د یوه راپور په خپرولو سره افغانستان د هغو ۱۱ هېوادونو په ډله کې راوستی، چې د ښځینه سوداګرو لپاره تر ټولو بد ځای بلل شوی دی.