د طالبانو د کورنیو چارو وزارت ویاند عبدالمتین قانع د دوشنبې په ورځ په ټولنیزې شبکې اېکس خپور کړي پیغام کې ویلي، چې د دغې ډلې د پاسپورټ ادارې مشر مولوي عبدالکریم حسیب په کندهار کې نه دی توقیف شوی.
هغه ویلي: "څه موده وړاندې، د ننګرهار په باریکاب کې د ځمکو په تړاو لاریونونه وشول، چې د همدې موضوع د وضاحت لپاره ښاغلی حسیب او د کورنیو چارو او ملي دفاع وزارت یو شمېر مسوولین د مشرتابه مقام ته غوښتل شوي دي."
عبدالمتین قانع ټینګار کوي، چې د پاسپورټ ریاست چارې په عادي توګه روانې دي او هېڅ کومه ستونزه پکې نه شته دی.
ځینو سرچينو افغانستان انټرنشنل ته ويلي؛ چې د طالبانو د پاسپورټ ادارې مشر عبدالکريم حسيب د پنجشنبې په ورځ د غبرګولي له دریېمې راهيسې د ملا هبت الله په امر نیول شوی او بندي دی.
په کندهار کې د شالمار په نوم مېله، چې شاوخوا ۴۰ ورځې دوام کوي، هر کال د توت پخېدو پر مهال د ارغنداب په ولسوالۍ کې جوړيږي.
افغانستان انټرنشنل ـ پښتو د دې مېلې ځني برخې په تصوير کې وړاندې کوي.
په دې مېله کې د ښار ترڅنګ د ولسواليو، د ډېورنډ کرښې د ها غاړې چمن او لېرې پرتو سیمو خلک برخه اخلي.
د مېلې ګډنوال تر ډېره تفريحي لوبې او په خاص ډول محلي لوبه غېږنيونه ترسره کوي.
یو شمېر میله والو افغانستان انټرنشنل ـ پښتو ته د تصويرونو د ليږولو ترڅنګ ويلي، چې طالبانو ورباندې ډېر بنديزونه لګولي او طالب استخباراتو به پرله پسې تعقیبول.
د دوی په خبره، چې مخکې به يې په دې مېله کې د «موسيقي، لډو، قطعو، اتڼ، دریا ږغول او نورې تفريحي لوبې» کولې، چې سږ کال ورته طالبانو اجازه نه ورکول.
مېله وال وايي، چې طالبانو تر ډېره د دوی د شخصي مجلسونو او ناستو د ويډيو او عکس اخيستلو اجازه هم نه ورکول.
د کندهار په ارغنداب ولسوالۍ کې د شالمار د دغې مېلې ډېرې برخې د نورو کلونو بر عکس سږ کال له وخت څخه مخکې ختمې شوې او يو شمېر مېله کوونکي خپلو سيمو ته تللي، چې دوی یې لامل د طالبانو بنديزونه او محدودیتونه یادوي.