د افغان کرېکټ له لوبغاړو نیولې د هند د سینما تر فلمي ستورو له رفح سره د غمرازۍ کمپاین کې په میلیونونو کسانو برخه اخیستې. د غزې تړانګې سویل ته رفح ښار کې د فلسطیني کډوالو پر یوه پنډغالي د اسراییلي پوځ برید د افغانستان په ګډون د نړۍ په ګوټ ګوټ کې له پراخو غبرګونونو سره مخ شوی دی.
اسراییلي پوځ د یکشنبې په ماښام په رفح ښار کې د فلسطیني کډوالو پر پنډغالي برید وکړ، چې په ترڅ کې یې لسګونه ملکي وګړي ووژل شول.
د حماس د روغتیا وزارت ویلي، چې په دغه برید کې ۴۵ کسان وژل شوي او ۲۴۹ نور ټپیان شوي دي.
د اسراییل له دې برید وروسته د رفح ښار له اوسېدونکو سره د غمرازۍ په موخه په ټولنیزو رسنیو کې کمپاین پیل شو، چې په دغه کمپاین کې د نړۍ له بېلابېلو برخو سیاستوالو، د مدني ټولنې غړو، د ښځو د حقونو فعالانو، خبریالانو، ورزشکارانو، هنرمندانو او یو شمېر نورو نامتو څېرو برخه اخیستې ده.
دغه کمپاین چې په انسټاګرام کې پیل شوی دی، تر اوسه ۴۰،۶ میلیونه کسانو پکې برخه اخیستې ده.
له افغانستانه د کرېکټ نامتو لوبغاړو محمد نبي، راشد خان، رحمان الله ګربز، نور احمد او مجيب د یادو بریدونو د قربانیانو له کورنیو سره خواخوږي ښودلې.
اخوا د سولې د نوبل جایزې ګټونکې ملالې یوسفزۍ، افغان لیکوالې شفیقې خپلواک، افغان سندرغاړې غزل سادات او دې ته ورته لسګونو نورو افغان خبریالانو او د ښځو د حقونو فعالان هم له دغه کمپاین سره یو ځای شوي دي.
دا کمپاین یوازې په څو محدودو هېوادونو پورې نه خلاصه کیږي، د نړۍ له ګوټ ګوټ څخه خلک غواړي چې په غزه کې د اسراییل بریدونه ودریږي.
د بالیوډ ډېر شمېر نامتو فلمي ستورو هم په دې کمپاین کې ګډون کړی.
شیلپا شیټي، بې پاشا باسو، سوناکشي سینا، ملایکا ارورا، پریانکا چوپړا او د هند د سینما یو شمېر نورو فلمي ستورو هم د رفح ښار له اوسېدونکو سره غمرازي کړې ده.
له دې سره، اروپایي او عرب هېوادونو هم په رفح ښار کې د اسراییلو وروستي بریدونه غندلي دي.
د اروپایي اتحادیې د بهرني سیاست مسوول جوزپ بورل، د فرانسې ولسمشر امانوېل مکرون، د ناروې او اسپانیا په ګډون یو شمېر نورو اروپایي هېوادونو هم دا بریدونه غندلي او د درېدو غوښتنه یې کړې ده.
د ترکیې ولسمشر رجب طیب اردوغان بیا له بنیامین نتنیاهو او د دې هېواد له نور چارواکي څخه د حساب د اخیستو ژمنه کړې ده.
د دغه راپور له مخې؛ د سې شنبې په ورځ (د غبرګولي ۸ مه) نېټه د اسراييل پوځ هغه سیمه په نښه کړه، چې مخکې د بشر دوستانه موخو او د فلسطيني کډوالو د اوسېدو لپاره ټاکل شوې وه.
الجزیرې لیکلي، چې په وژل شویو کې ۱۳ ښځې هم شاملې دي.
د دې شبکې په وینا؛ اوس مهال په رفح کې کوم فعال روغتون نه شته.
اسراییلي پوځ د یکشنبې په ماښام (د غبرګولي ۶مه) د غزې تړانګې په جنوب کې د رفح په ښار کې د فلسطیني کډوالو پر کمپ برید وکړ،چې په ترڅ کې یې لسګونه ملکي وګړي ووژل شول.
د حماس د روغتیا وزارت ویلي، په دغه برید کې ۴۵ کسان وژل شوي او ۲۴۹ نور ټپیان شوي دي.
د اسراييل پوځ (د غبرګولي ۸مه) اعلان وکړ، چې دا عمليات يې د حماس د دوو جګپوړو قوماندانانو د نښه کولو لپاره تر سره کړي، چې په دې کمپ کې ځای پر ځای شوي وه.
د اسراييل پوځ زياته کړه، چې ګومان کيږي د اسراييل له هوايي بريد وروسته دویمه چاودنه د فلسطيني کډوالو په کمپ کې د مهماتو یا نورو اور اخيستو له امله وي، چې د ملکيانو د وژل کېدو لامل شوې ده.
د اسراييل لومړي وزیر بنیامین نتنیاهو (د غبرګولي ۷ مه) نېټه خبرداری ورکړ، چې که دغه هېواد د غزې په جګړه کې خپلو موخو ته له رسېدو مخکې جګړه پای ته ورسوي او تسلیم شي د اکټوبر د اوومې نېټې بريد ته ورته یوه بله ډله ييزه وژنه به وشي.