په کندهار کې د طالبانو والي د کورنيو چارو له وزارت څخه غواړي، چې د امنيت په برخه کې د کندهار «ځانګړو او ملي قطعو» ته په لوړه کچه پاملرنه زياته او اړتياوې پوره کړي. په کندهار کې د طالبانو ځانګړې قطعات د ملا هبت الله اخونزاده د ځانګړو غونډو امنیت ترڅنګ ځانګړي علملیات ترسره کوي.
د کندهار د طالبانو د والي دفتر د یکشنبې په ورځ د یوې خبرپاڼې په خپرولو سره ویلي، چې د حميدالله اخونزاده په مشرۍ ددې ډلې n کورنيو چارو وزارت يو پلاوی له «ځانګړې او ملي قطعاتو» څخه د لېدنې په موخه کندهار ته راغلی دی.
د خبرپاڼې د معلوماتو له مخې، دغه پلاوي يوه اونۍ په کندهار کې د همدې دوو قطعو د ملا هبت الله ځانګړی ځواک او ملي قطعې د فعالیت، نظامي زده کړو، وسلو او وسايطو د څار او ستونزو اورېدلي دي.
د کورنيو چارو وزارت پلاوي په کندهار کې د طالبانو والي ملا شيرين ته په خپل وروستي راپور کې ويلي، چې د ځانګړي قطعې ستونزې يې اورېدلې او باید په ګډه ورته پاملرنه وشي.
په خبرپاڼه کې دا نه دي ویل شوي، چې په کندهار کې د طالبانو نظامي قطعات څه ستونزې لري.
په کندهار کې د طالبانو والي ملا شيرين د امنيت د ټينګښت په برخه کې د ځانګړې قطعې فعالیتونه ستايلي او د کورنیو چارو له وزارت څخه یې غوښتي، چې همدې قطعو ته باید په لوړه کچه پاملرنه وکړي.
په کندهار کې یاده ځانګړې قطعه د طالبانو کورنيو چارو وزارت پورې اړوند ده او د دې ډلې د مشر هبت الله اخونزاده د غونډو، مجلسونو او لیدنو د امنيت د ټینګښت ترڅنګ په ځانګړو ورځو کې د پېښو د مخنیوي په موخه امنیت ساتي.
د طالبانو ملي قطعات بيا په ښار او ولسوالیو کې د امنيت په برخه کې کار کوي، چې د طالبانو په خبره ډېری یې د عامه نظم په ټینګښت کې دندې پر مخ وړي.
څه موده مخکې افغانستان انټرنشنل – پښتو د خپلو سرچينو له قوله د ملا هبت الله د ساتنې د ځانګړې ډلې په اړه معلومات خپاره کړي و.
د معلوماتو له مخې، د ملا هبتالله د ځانګړي ځواک شمېر شاوخوا ۷۰۰۰ کسانو ته رسیږي.
دغه قطعه د کابل، ننګرهار، پکتیا، لوګر، کندوز، بدخشان، پنجشیر، نیمروز په ګډون د افغانستان په ډېرو ولایتونو کې څانګې لري.
د ملا هبتالله یادې قطعې ته د طالبانو د دفاع او کورنیو چارو وزارت په پرتله ډېر امکانات په واک کې ورکړل شوي دي.
په ورته وخت کې څه موده مخکې ځینو طالب سرچینو افغانستان انټرنشنل ـ پښتو ته ويلي و، چې یاده ډله د داعش او نورو مخالفو ډلو د ځپلو لپاره ځانګړې قطعه جوړوي.
له دې سره، د طالبانو د کورنیو چارو وزارت د ځانکړو ځواکونو عمومي قومندانۍ په یوه مکتوب کې لیکلي، چې د ملا هبت الله په شفاهي هدایت سره هغه بې برخلیکه طالبان په دغه قطعه کې ګمارل شوي، چې د بستونو په له منځه تلو سره یې دندې له لاسه ورکړي او بې معاشه دي.
