د طالبانو بهرنيو چارو وزارت وايي، د دې ډلې د بهرنیو چارو وزير له ایراني سیال علي باقري کني سره په خبرو کې د غزې د ملاتړ اړوند «د افغانستان او ایران د ګډ دریځ» ستاینه کړې. د ایران بهرنيو چارو وزير له نورو اسلامي هېوادونو هم غوښتي، چې د «غزې د مظلوميت» په اړه خپل ږغ پورته کړي.
په دې خبرو کې امیرخان متقي زیاته کړې، چې تفاهم د پرمختګ لاره ده او د دوی په اداره کې د نورو لاسوهنه د چا په ګټه نه ده.
د طالبانو بهرنيو چارو وزارت نن ويلي، چې دواړو لوريو په ټلیفوني خبرو کې د اقتصادي او سياسي اړيکو پر پياوړتيا هم خبرې او په دې برخه کې يې يو ځل بيا خپلې ژمنې تکرار کړې دی.
امیرخان متقي دا هم ویلي چې د دوی په واکمنېدو سره د افغانسان او ایران ترمنځ په اقتصاد او سیاسي اړیکو کې ښه پرمختګ شوی دی.
د طالبانو تر واکمنېدو مخکې هم د دې ډلې پلاوي ایران ته تلل او له واکمنېدو سره تهران د چین، روسیې او پاکستان په څېر یو هغه هېواد دی چې له طالبانو سره یې مختلفو برخو کې اړیکي پراخ شوي دي.
