د پاکستان ولسمشر اصف علي زرداري وایي، چې په دغه هېواد کې به د ترهګرۍ جرړې یا رېښې له منځه یوسي. ښاغلي زرداري دا خبرې په بنو کې د پروني برید له امله د پاکستان د اتو پوځیانو وژل کېدو په غبرګون کې کړې دي.
اصف علي زرداري په یوه بیان کې د بنو په دغه پېښه کې د وژل شویو پوځیانو کورنیو ته ته تسليت ویلی او زياتوي، چې: «ملت د خپلو سرتېرو په قربانيو وياړي.»
د نوموړي په خبره، د بنو په پېښه کې د پاکستاني ځواکونو پر وخت اقدام د يوه لوی زيان مخه ونيوله.
د پاکستان پوځ ومنله، چې تېره ورځ په بنو کې د دوی پر یوه مرکز په موټر بم برید کې اته سرتېري وژل شوي دي؛ خو د ټپیانو په اړه یې څه نه دي ویلي.
تر دې وړاندې په سیمه کې پولیس چارواکو خبریالانو ته ویلي و، چې په پېښه کې څلور ولسي کسان هم وژل شوي او ۲۶ نور ټپیان دي.
د حافظ ګلبهادر په مشرۍ د پاکستاني طالبانو یوې ډلې د دې برید مسوولیت منلی دی.
