د غزې په سوېلي او مرکزي سیمو کې د اسراییل د هوايي بریدونو له امله ۵۷ فلسطینیان وژل شوي دي

اسراییل یوازې په خان یونس کې د بې ځایه شویو فلسطینیانو پر پنډ غالو بمبار کړی، چې په ترڅ کې یې د ماشومانو په ګډون ۱۷ فلسطینیان وژل شوي دي.
د اسراییل پوځ وايي، په دغه بریدونو کې یې د فلسطیني وسله‌والو ډلو غړي په نښه کړي او د ملکي تلفاتو د راپورونو په اړه پلټنې کوي.
د اسراییل پوځ ادعا کوي، چې په غزه کې د اسراییل د هوايي بریدونو او ځمکنیو عملیاتو په ترڅ کې د حماس د پوځي څانګې نیمايي مشران وژل شوي دي.
د غزې د روغتیا وزارت د معلوماتو له مخې، د اکټوبر له اوومې راهیسې په غزه کې تر ۳۸ زرو زیات فلسطینیان وژل شوي، چې ډېری یې ماشومان او ښځې دي.
حماس پر اسراییل تور پورې کړی، چې په غزه کې یې بریدونه زیات کړي چې د اوربند هوکړې ته د رسېدو هڅې له خنډ سره مخ کړي.
اسراییل بیا وايي، هڅه کوي د حماس وسله‌وال له منځه یوسي.
له بل پلوه د فلسطیني کډوالو لپاره د ملګرو ملتونو اداره وايي، چې په غزه کې د اسراییل د بریدونو له امله د رامنځته شویو ویجاړیو پاکول ممکن ۱۵ کاله وخت ونیسي.