افغان لرغونپوه زمریالی طرزي په فرانسه کې ومړ
د دغه لرغونپوه خور هما طرزي افغانستان انټرنشنل ته وویل، زمریالی طرزي د جمعې په ورځ د چنګاښ په ۲۹مه د فرانسې په سټراسبورګ ښار کې مړ شو. زمریالی طرزي په ۱۹۳۹ کال کې په کابل کې زېږېدلی.
ښاغلی طرزي بیا د زدهکړو لپاره فرانسې ته ولاړ او د سټراسبورګ په پوهنتون کې یې د دوکتورا تر کچې زدهکړې وکړې.
طرزي د لرغون پېژندنې په برخه کې څو اثار لیکلي دي.
همدارنګه نوموړي په سټراسبورګ پوهنتون کې د استاد په توګه دنده درلوده.
ډاکټر طرزي له ډېرو کلونو راهیسې په جلال اباد، بامیان او ای خانم کې د بودایانو په سیمه کې په کیندلو بوخت و.
ښاغلي طرزي د خپلو څېړنو په پایله کې د فرانسې له حکومت څخه د شیویلیر پالم دي اکوډیمیک مډال او د یونان له حکومت څخه د سینټ کنستانټین د سرو زرو عالي مډال ترلاسه کړی دی.
هغه په یونیسکو کې د ختیځ لرغونپوهنې مشر په توګه هم دنده تر سره کړې ده.
ډاکټر طرزي تر دې مخکې د افغانستان د لرغونپوهنې د مشر په توګه کار کړی دی.
