د چمن پرلتوال وایي، چې د سپین بولدک ـ چمن دروازه د تېر په څېر د تګ راتګ پر وړاندې پرانېستل شوه. پرلتوالو نن وویل، چې پر دغه لاره یې د پاکستان د حکومت له لورې د پاسپورټ د حتمي کېدو په غبرګون شاوخوا لس میاشتي اعتراضونه وکړل.
د پاکستان حکومت د ۱۴۰۲ کال د تلې په میاشت کې د پاکستان حکومت له لورې د سپین بولدک ـ چمن پر دروازه د پاسپورټ په وسیله د تګ و راتګ د حتمي کېدو پرېکړه وکړه.د سوېلي پښتونخوا چمن زرګونو سوداګرو، ځايي اوسیدونکو او ځايي سیاسي ګوندونو د پاکستان د دغې پرېکړې په غبرګون پرلت ووهه.په دې موده کې د پاکستان حکومت څو ځله د پرلت د پای ته رسولو په موخه پر پرلتوالو بریدونه وکړل.د پاکستان د حکومت له لورې پر پرلتوالو د برید په پایلو کې یو شمېر پرلتوال بنديان، یو کس مړ او لسګونه ټپیان هم شول.نن یکشنبې (د چنګاښ ۳۱مه) بیا د پرلت د مرکزي کمیټي بندي غړي له بنده خوشي شول.د چمن پرلت ویاند صادق خان اڅکزی چې له شاوخوا دوه میاشتنې بند وروسته نن راخوشې شوی وايي: ((موږ ژمنه کړي وه، چې د چمن د اوسیدونکو او د پرلتوالو ټولې غوښتنې حل کوو او نن مو هغه ژمنې پوره کړې.))نوموړی وايي، چې تر دې وروسته دا لاره به د سپین بولدک او چمن د اوسېدونکو پر مخ نه بندیږي.د یادو کسانو له خوشې کېدو سره سم پرلتوالو اعلان وکړ، چې سر له نن ورځې د سپین بولدک ـ چمن دروازه له پاسپورټ او ویزې پرته د پخوا په شان پر تذکره او شناختي کارډ د مسافرو پر مخ خلاصه شوه.قبایلي مشر ملک عنایت الله کاسی وايي:« ستاسو چې څه خوارۍ وې، ستاسو چې څه غوښتنې وې هغه سل سلنه ومنل شوې. له دې وروسته به د چمن په اړه هره مشوره د چمن د لغړیانو سره کیږي. له نن وروسته ستاسو تګ راتګ په تذکره او شناختي کارډ باندې کیږي. هغه ځوانان چې شناختي کارډونه نه لري د هغوی لپاره به ژر تر ژره شناختي کارډونه ورکړل شي.»خو د یادونې ده، چې تر اوسه د پاکستان د حکومت له لورې د یادې دروازې د خلاصیدو په اړه په رسمي ډول څه نه دي ویل شوي.پر ډیورنډ کرښه د سپین بولدک ـ چمن دروازه د افغانستان او پاکستان تر منځ یو له مهمو سوداګریزو لارو څخه ده، چې پر دغه سوداګریزه لاره باندې څو ځله د تېر جمهوري نظام او د طالبانو د واکمنۍ پرمهال هم د دواړو هېوادونو ترمنخ وسله والي نښتې هم شوې دي.تر اوسه د کندهار سیمه ییزو چارواکو په رسمي ډول د دغې دروازې د خلاصولو په اړه خپل دریځ نه دی په ډاګه کړی.
