د افغانستان د کورني کرېکټ د اووم پړاو لېسټ اې سیالیو په ۱۰مه لوبه کې ماهيپر ستورو لوبډلې هندوکش سټرايکرز ته د ۷ ويکټو په توپير ماتې ورکړه. د ماهيپرو ستورو لوبډلې پيليز لوبغاړي نويد عبيد ښه وځليد، لوبډله يې تر بريا ورسوله او د لوبې غوره لوبغاړی هم وټاکل شو.
د افغانستان د کورني کرېکټ د اووم پړاو لېسټ اې سیالیو د ۱۰مي لوبې پچه د هندوکش سټرایکرز لوبډلې وګټل او لوبډلمشر رحمت شاه زرمتي د توپوهنې پرېکړه وکړه.
هندوکش لوبډلې په ۴۸.۴ اور کې د خپلو ټولو لوبغاړو په سوځېدو سيالې لوبډلې ته ۲۶۵ منډې هدف وټاکه.
د هندوکش په لوبډله کې اعجاز احمد ۹۸، شمس الرحمن ۵۲ او افسر ځاځي ۴۴ منډې جوړې کړې.
د ماهيپر ستورو په توپ اچوونکو کې فريد احمد او ګلبدين نايب درې – درې او ظاهر خان ۲ لوبغاړي وسوځول.
د لوبې په دویمه برخه کې د ماهيپر ستورو لوبډلې په ۳۷.۲ اور کې د خپلو ۳ لوبغاړو په سوځېدو دغه هدف پوره کړ او د ۷ ويکټو په توپير يې هندوکش ته ماتې ورکړه.
د ماهيپر ستورو لوبډلې پيليز لوبغاړي نويد عبيد په ۴۲ توپونو د ۱۲ څلوريزو او يوې شپږيزې په مټ ۷۱ چټکې منډې وکړې او د لوبې غوره لوبغاړی ونومول شو.
په دې لېست اې یو ورځنیو سیالیو کې د رحمت شاه زرمتي په لوبډلمشرۍ هندوکش سټرایکرز لوبډلې مخکنۍ څلور لوبې ګټلې او نن يې ماتې وخوړه او ماهیپر ستوري لوبډلې بیا د حشمت الله شاهدي په لوبډلمشرۍ یوازې یوه لوبه بایللې او نورې ټولې لوبې یې ګټلې دي.
سرچینو افغانستان انټرنشنل - پښتو ته ویلي، چې د طالبانو مشر هبت الله د کورنیو چارو او دفاع وزارتونو او استخباراتو ریاست له مشرانو او مرستیالانو سره په وروستۍ غونډه کې ويلي، چې د ټي ټي پي د فعالیت مخه باید ونیول شي او په ډېورنډ کرښه باید د داعش د مخنیوي تدابير زیات کړي.
په غونده کې د داعش ډلې د فعاليت پر مخنيوي او خپل منځني جنجالو پر حل هم خبري شوي.
د طالبانو مشر هبت الله اخوندزاده د تېرې يکشنبې په ورځ ( د چنګاښ ۲۵مه) نېټه په کندهار کې له څو میاشتو وروسته په لومړی ځل د طالبانو امنیتي مشران ور وبلل، چې د داخلي امنيت د ټينګښت او خپل منځنۍ شخړو د حل په موخه ورسره خبرې وکړي.
په دې غونډه کې د طالبانو کورنيو چارو وزير سراج الدين حقاني، د هغه مرستيال صدر ابراهيم، د دفاع وزير ملایعقوب او مرستيال قیوم ذاکر، د استخباراتو مشر عبدالحق وثيق او د هغه لمړی مرستيال تاجمير جواد ترڅنګ ملافاضل مظلوم، د کندهار، غزني، پکتيا، پکتيکا، خوست او لوګر واليانو هم ګډون درلود.
سرچينې افغانستان انټرنشنل ـ پښتو ته ويلي، چې د طالبانو د خپل منځني جنجالونو له کبله د وسله والو ډلو په خاص ډلو د داعش فعالیت د زياتېدو او د پاکستان پوځ له خوا ډېورنډ کرښې ته په نږدې سیمو کې د احتمالي عملياتو په پايله کې د طالبانو مشر اړ شو، چې امنیتي مسوولين ور وبلي.
سرچينه زياتوي، چې په غونډه کې تر ډېره د پاکستاني طالبانو تحريک د فعالیتونو پر مخنيوي خبري شوي او هبت الله اندېښنه څرګنده کړې، که په پاکستان کې پر ټي ټي پي عمليات زياتيږي باید افغانستان ته د دې ډلې د غړو د تګ مخه ونيول شي.
سرچينه وايي؛ په غونډه کې هبت الله اخوندزاده د امنيتي ادارو له مسولينو څخه هم ناخوښي څرګنده، چې د نوموړي اطاعت نه کوي.
د سرچينې په خبره، چې د طالبانو مشر د تصفيې کمېسيون د فعالیتونو څخه هم خوښ نه و او اندېښنه يې څرګنده کړه، چې لا هم په ډېرو سېمو کې يو شمېر کسان د «پرديو کړيو په اشاره وسله وال فعالیتونه» تر سره کوي، چې باید په جدي توګه یې مخه ونيول شي.
هبت الله په دې امنيتي غونډه کې ویلي، چې لا هم وسله والي غلاوې، مرموزې وژنې، انسان تښتونې او ورته نورې پېښې شته دي.
نوموړي خپلو امنيتي مسوولینو ته ویلي که اطاعت ونه کړي پر نويو تغيراتو به غور وکړي.
دوې ورځې وړاندې د پاکستان د بهرنیو چارو وزارت ویاندې ممتاز زهرا بلوڅ ویلي، افغان طالبان دې په پاکستان کې په ترهګريزو پېښو کې د ښکېلو کسانو پر وړاندې جدي ګام واخلي.
هغې په خپلې اونیزې خبري ناسته کې ویلي، د حافظ ګل بهادر ډلې افغانستان کې پناه اخستې او په پاکستان کې په ترهګرۍ کې لاس لري.
نوموړې ویلي، چې پاکستان د بنو د برید په تړاو له افغانستان سره خپله اندېښنه شریکه کړې ده.
تر دې وړاندې په اسلام اباد کې د طالبانو سفير سردار احمد شکېب د پاکستان د اندېښنو په ځواب کې ویلي وو، چې دوی به په افغانستان کې د پاکستان طالبانو تحريک ډله وځپي.
د طالبانو يوې سرچينې افغانستان انټرنشنل ـ پښتو ته وویل، چې په راتلونکې مياشت کې د پاکستان يو لوړ پوړی پلاوی د طالبانو سره د ليدنې لپاره افغانستان ته راځي او تر ډېره به د دواړو هېوادو د امنيتي وضعت د ښه کېدو په اړه خبري وکړي.
د طالبانو مشر په امنيتي ادارو کې «د فرمانونو او امر نه منلو له کبله داعش ډله پر قوي کېدو ده» او که خپل منځني جنجالونه حل نه شي او امنيتي وضعت کنټرول نه شي د دې ډلې د فعاليت زياتېدو وېره شته.
درې ورځي مخکې د طالبانو د بهرنیو چارو وزیر اميرخان متقي ويلي وو، چې داعش او یو شمېر ډلو د عاشورا پر مراسمو د برید پلان درلود.
د هغه په خبره، چې له تېر یو کال راهیسې د عاشورا پر مراسمو د برید پلان و؛ خو دغې ډلې یې مخه ونیوله.
د دې سره ترڅنګ د سمیع سادات په مشرۍ د افغانستان متحدې جبهې په یوه راپور کې ویلي، چې د القاعده شبکه په افغانستان کې «۸۰۰ قوماندانان او شاوخوا ۵۰ زره جنګیالي» لري.
د دې جبهې په وینا؛ د القاعده شاوخوا ۳ زره جنګیالي د پاکستاني طالبانو د غړو په ملاتړ د پاکستان له حکومت سره جنګېږي.
د راپور له مخې؛ په افغانستان کې د القاعدې ډېری قوماندانان له عراق، سوریې او یمن څخه راغلي او د دې شبکې د ځواکونو په منځ کې په زرګونو روزونکي هم شته چې ډېر ځله افغانستان او بهر ته تګ راتګ کوي.
د طالبانو مشر هبت الله په داسې حال کې د طالبانو حکومت امنیتي ارګانونو سره ناسته کړې، چې ملګرو ملتونو په خپل کلني رپوټ کې افغانستان کې د امنیتي پېښو د ډېرېدو په اړه اندېښنه څرګنده کړې وه.
ملګرو ملتونو دا هم ویلي، چې د طالبانو حکومت هڅه کړې سیاسي او اقتصادي ډګرونه پیاوړي کړي؛ خو د حکومتولۍ په اساسي مسلو کې زیاتېدونکو داخلي اختلافاتو سره مخ دي.
بل خوا ملګرو ملتونو دا هم ویلي، چې د طالبانو تر واکمنۍ لاندې افغانستان د القاعده او داعش په څېر ډلو لپاره په خوندي ځای بدل شوی دی.
دېر وخت طالب مشران په افغانستان کې د وسله والو ډلو فعالیت رد کړي او دا يې «پرديو کړيو تبلغات» یاد کړي دي.
د بشري حقونو یوه اداره "هه نګاو" خبر ورکړی، چې د يکشنبې په ورځ (د چنګاښ ۳۱مه) نېټه یو افغان د نشه يي توکو د جرمونو په تور د کرج په قزل حصار زندان کې اعدام شو. تر اوسه د دغه کس د هویت په اړه څه نه دي ویل شوي.
هه نګاو راپور ورکړی، چې په ایران کې د شنبې او یکشنبې په ورځو کې اته تنه اعدام شوي دي، چې په اعدام شویو کسانو کې یوه ښځه هم شامله ده.
د بشري حقونو دغه سازمان لیکلي، چې د یوه افغان په ګډون دغه څلور کسان د یکشنبې په ورځ (د چنګاښ ۳۱مه) د نشه يي توکو د جرمونو په تور د کرج په قزل حصار زندان کې اعدام شول.
هه نګاو ليکلي، چې درې تنه بنديان داود براهوي، يو بلوڅ بندي سعيد محمدپور او مهدي علي اکبري وو؛ خو د افغان هويت نه دی په ډاګه شوی.
دغه سازمان لیکلي، چې د شیراز په مرکزي زندان کې د شنبې په ورځ (د چنګاښ ۳۰مه) نېته د یوې ښځې په ګډون څلور نور زندانیان د قتل او جنسي تیري په تور اعدام شول.
د دغو کسانو د هويت په اړه ویل کيږي، چې منصور توکلي، حامد شکسته، محسن استواري او د ښځې کورنۍ نوم محمودينيا ښودل شوي دي.
د طالبانو د رییس الوزرا سياسي مرستیال وایي، چې په افغانستان کې به د هېچا فرمايش ته سر ټيټ نه کړي او ځيني هېوادونه دې د ناسمو تورونو پر ځای واقعتونو ته پام وکړي.
مولوی عبدالکبير ویلي، چې «له افغانستانه هېچا ته ګواښ نه شته او ځيني هېوادونه دې خپل د بام واورې په افغانستان نه اچوي.»
د طالبانو د رییس الوزرا سیاسي مرستيال مولوي عبدالکبير د یکشنبې په ورځ (د چنګاښ ۳۱مه) د سږکال د کانکور د ازموينې د پايلو په اعلان غونډه کې ويلي: «ځيني هېوادونه د خپلو ګټو پر اساس ناسم معلومات او منفي تبلغات کوي.»
که څه هم نوموړي د کوم مشخص هېواد نوم یاد کړی نه دی؛ خو زياته کړې یې ده: «د افغانستان له خاورې څخه هيچا ته ګواښ نه شته او ځیني هېوادونه دې د خپل بام واورې په افغانستان نه اچوي.»
په خيبر پښتونخوا کې د پاکستاني پوځ پر يوې اډې د ټي ټي پي د وسله وال بريد وروسته پاکستان په پرله پسې توګه ويلي، چې د افغانستان خاوره د پاکستان پر ضد کارول کيږي.
د پاکستان د بهرنيو چارو وزارت په اسلام اباد کې د طالبانو د سفير مرستيال هم احضار کړی و او له هغه څخه يې غوښتي وو، چې طالبان دې د بنو د برید په اړه په بشپړه توګه څېړنه وکړي او د عاملينو په وړاندې ژر تر ژره، قوي او اغېزناک اقدامات وکړي.
د پاکستان پوځ وايي، چې د حافظ ګل بهادر ډله په افغانستان کې مېشته ده او پوځ به له افغانستان څخه د ګواښونو پر وړاندې لازم اقدام وکړي.
د طالبانو د ریاست الوزرا سياسي مرستيال وایي، چې ګاونډيان او د سېمې هېوادونه دې د اړيکو پاللو لپاره د دوی نرم موقف د کمزورتیا په معنا نه تعبيروي.
هغه زياتوي: «موږ هڅه کوو، چې له ګاونډیانو او د سېمې له هېوادونو سره ښې اړيکې ولرو؛ خو دا موقف باید زموږ د ضعف په نیت تعبير نه شي؛ بلکي دا د حسن نیت نښه ده.»
نوموړي ويلي، چې نږدې هېوادونه دې د ناسمو تورونو پر ځای پر واقعتونو تمرکز وکړي او د همکارۍ پراختيا ته دې زمينه برابره کړي، تر څو د نړۍ د امنيت او اقتصاد د پياوړتيا لپاره کار شوی وي.
په افغانستان کې د طالبانو له واکمنۍ وروسته ډېری وخت پاکستان پر دغه ډله نيوکه کوي، چې «ترهګرو ډلو» ته یې ځای ورکړی دی.
خو طالبان د پاکستان دا ډول څرګندونې او تورونه رد کړي دي.
پخواني ولسمشر حامد کرزي د افغانستان لپاره د ملګرو ملتونو د سرمنشي له ځانګړې استازې روزا اوتنبایوا سره په ليدنه کې د نجونو لپاره د ښوونځيو او پوهنتونو پر پرانېستلو ټينګار کړی. ښاغلي کرزي زده کړې د یوه هېواد د ځان بسيا کېدو لپاره مهمې بللي دي.
پخواني ولسمشر حامدکرزي د يکشنبې په ورځ پر خپله اېکس پاڼه ليکلي، چې د ملګرو ملتونو د سرمنشي له ځانګړې استازې سره په ليدنه کې يې د دوحيې د وروستي ناستې په اړه هم خبري کړې او نظرونه يې تبادله کړي.
کرزي ويلي، چې له اوتنبايوا سره یې د سېمې پر حالاتو هم بحث کړی دی.
پر افغانستان د طالبانو له واکمنېدو وروسته حامد کرزی له بهرنیو چارواکو او استازو سره لیدنې کتنې کوي.
د افغانستان پخواني ولسمشر په تېر لوی اختر د مبارکۍ په پيغام کې هم له طالبانو غوښتي و، چې په هېواد کې دې د «نجونو او هلکانو» پر مخ د ښوونځيو او پوهنتونونو دروازې خلاصې کړي.
حامدکرزي په دې پيغام کې طالبانو ته ويلي و: « تعلیم مو د پرديو له احتیاجه د خلاصون او پرمختګ لاره ده.»
د طالبانو تر واک لاندې د کانکور ازموینو ملي ادارې له لوري د کابل د حبیبیې لېسې زدهکوونکی اتل خان رحیم زوی د ۳۵۹،۶۱ نمرو په ترلاسه کولو سره د ۱۴۰۳ کال کانکور ازموینه کې عمومي اول نمره اعلان شو. نوموړی د کابل پوهنتون طب پوهنځي ته بریالی شوی.
د کانکور په سږنۍ ازموینه کې د طالبانو له لوري نجونو ته د ګډون اجازه ورنه کړل شوه.
د یکشنبې په ورځ د (چنګاښ ۳۱مه) نېټه د طالبانو تر واک لاندې د کانکور ازموینو د ملي ادارې له لوري د ۱۴۰۳ کال د کانکور ازموینې پایلې اعلان شوې.
د ۱۴۰۳ کال د کانکور په ازموینو کې د کابل اوسیدونکی اتل خان رحیم زوی د ۳۵۹،۶۱ نمرو په ترلاسه کولو سره د کانکور عمومي اول نمره اعلان شوی او د کابل طب پوهنځي ته بریالی شو.
اتل خان په اصل کې د پکتیا ولایت اوسیدونکی دی خو د کابل په حبیبیې لیسه کې یې زدهکړي کړې دي.
د بلخ ولایت اوسیدونکی سید حامد هاشمي د ۳۵۷،۷۱ نمرو په ترلاسه کولو د کانکور ازموینو دویم نمره اعلان شو او د کابل پوهنتون د طب پوهنځي ته بریالی شوی.
د فراه ولایت اوسیدونکی شفیع الله نظامي د اقرا علم خصوصي ښوونځۍ زده کوونکی د ۳۵۷،۲۵ نمرو په ترلاسه کولو سره عمومي درېیم نمره اعلان شو او د کابل پوهنتون د طب پوهنځي ته بریالی شو.
همدارنګه د کابل ولایت اوسیدونکی زین الله ۳۱۰ نمرو په ترلاسه کولو د دیني مدرسو په ازموینه کې لومړی مقام ګټوونکی اعلان شو او د کابل پوهنتون د شریعاتو پوهنځۍ ته بریالی شوی دی.
د کانکور سږنۍ ازموینه د نجونو له ګډون پرته واخیستل شوه.
د طالبانو تر واک لاندې د ازموینو ملي ادارې سرپرست، عبدالباقي حقاني وایي، سږکال کانکور ازموینه کې ۴۱ زره او ۲۹۳ تنه لوړو زدهکړو ته، ۲۱۴۴ تنه نیمه لوړو زدهکړو ته او ۱۳۰۱ تنه هم دیني مدرسو ته بریالي شوي دي.
د حقاني د معلوماتو له مخې، په دغه ازموینه کې ۱۷ زره او ۷۲۱ تنه بې پایلې پاتې دي، ۲۴ زره او ۳۹ تنه په شرایطو برابر او ۱۷ زره او ۷۶۰ تنه یې دویم ظرفیت ته ځانګړي کړي دي.
د ۱۴۰۳ کال د عمومي کانکور ازموینو د پایلو د اعلان مراسمو کې لوړپوړو طالب چارواکو هم ګډون کړی وو.
د طالبانو د لوړو زدهکړو وزیر ندا محمد ندیم وايي، سږکال د تېر کال پرتله د بریالیو کسانو شمېر زیات دی.
نوموړی وايي، په افغانستان کې یې د زدهکړیالانو لپاره د زدهکړو لپاره خوندي چاپیریال رامنځته کړی.
د نوموړي په خبره نور به پوهنتونونه کې د ډلو ټپلو جوړولو ځای نه وي.
همدارنګه د رییس الوزار اداري مرستیال عبدالسلام حنفي د کانکور د پایلو اعلان په مراسمو کې په خپله وینا کې وویل: افغانستان د ابادۍ او پرمختګ لپاره موږ (طالبان) په هره برخه کې مسلکي او تجربه لرونکو ځوانانو ته اړتیا لرو.
نوموړي وویل: «نن موږ عالمانو، انجینرانو، ډاکترانو او مسکلي کسانو ته ځانګړې اړتیا لرو.»
خو نوموړي په خپلو خبرو کې د نجونو د زدهکړو او ښځینه مسلکي کادرونو په اړه یادونه ونه کړه.
د کانکور ازموینو د اعلان پر مهال د طالبانو د اوبو او انرژۍ وزارت سلاکار، ډاکټر فاروق اعظم وویل: د کانکور ازموینه د یوه هېواد د زدهکوونکو د علمي وړتیا د څرګندولو لپاره یو مهم میکانیزم دی.
د نوموړي په خبره کار اهل کار ته د سپارلو په موخه، ازموینه اخیستل یوه مهمه چاره ده.
نوموړي دا څرګندونې داسې مهال وکړې چې د طالبانو له واکمنېدو سره په افغانستان کې په ملکي او نظامي ادارو کې د زرګونو مسلکي کسانو پر ځای ملایان او قاریان په دندو وګمارل شول.
