پاکستان وايي، چې له افغانستان سره پر پوله یې د «واحد سند» بندیز نه دی لرې کړی او هیڅ مسافر ته به اجازه ورنکړي چې له ویزې او پاسپورټ پرته له پولې تېر شي. تر دې وړاندې په چمن کې پرلتوالو ویلي و، چې اسلام اباد منلې چې ځايي خلک له ویزې او پاسپورټ پرته له پولې تېر شي.
د پاکستان د بهرنیو چارو د وزارت ویاندې ممتاز زهرا بلوچ د پنجشنبې په ورځ په اسلام اباد کې یوې خبري غونډې ته وویل: «له افغانستان سره پر پولو کې به د واحد سند تګلاره عملي شي او هیڅ بهرنی ته به اجازه ورنکړل شي چې له قانوني اسنادو پرته پاکستان ته داخل شي.»
په چمن کې د پاکستاني حکومتي چارواکو او پرلتوالو تر منځ له خبرو وروسته ځینو رسنیو د پرلتوالو له قوله راپور ورکړی و، چې اسلام اباد موافقه کړې چې د پولې د تېرېدو لپاره د واحد سند طرزالعمل لغوه کړی او له همدې امله په چمن کې پرلتوالو خپل څو میاشتنی پرلت پای ته ورساوه.
په همدې حال کې، ممتاز زهرا بلوچ وویل، چې تیره اونۍ د بریالي خبرو اترو وروسته، پوله د تګ راتګ محدودیتونو په نرمولو سره بېرته پرانستل شوه، مګر هغې په ښکاره ډول د "واحد سند طرزالعمل" لغوه کول رد کړل.
د پاکستان پخواني موقت لومړي وزیر انوالحق کاکړ د ۲۰۲۳ کال په وروستیو کې د پاکستان او افغانستان له پولې څخه د تېرېدونکو مسافرو لپاره د "واحد سند" طرزالعمل د پلي کولو اعلان وکړ. انوارالحق کاکړ په هغه وخت کې ویلي و، چې د پاکستان او افغانستان تر منځ په سرحدي سیمو کې ټول ځايي خلک یوازې د ویزې او پاسپورټ پر مټ له پولې د تېرېدو اجازه لري.
خو د چمن خلکو، چې د دواړو هېوادونو ترمنځ سرحدي سیمه ده، د پاکستان د حکومت له پرېکړې وروسته شاوخوا ۶ شپږ میاشتې پرلت او لاریونونه وکړل او دا یې "غیر عادلانه" پرېکړه وبلله.
دوی ویلې، چې ځمکې او کورونه یې له پولې هاخوا او دې خوا دي، او هره ورځ خپل کور او ځمکو ته د تللو لپاره نه غواړي چې له پاسپورټ او ویزې کار واخلي.
