په ټولنیزو رسنیو کې خپره شوې ویډیو ښیي چې د ترکیې ولسمشر یو ماشوم ته هغه مهال پر مخ څپېړه ورکړه چې د ده لاس یې ښکل نه کړ. دغه ماشوم پر مخ له څپېړې وروسته د رجب طیب اردوغان لاس ښکل کړ، او هغه ډالۍ ورکړه.
دغه پېښه د ترکیې په شمال ختیځ کې د ریزه په ښار کې خپلو څښتنانو ته د کورونو د کونجۍ سپارلو په مراسمو کې وشوه.
وروسته له هغه چې د همدې کورنۍ دوه ماشومان په سټیج کې اردوغان ته ورغلل، یوه ماشوم د اردوغان د لاس له ښکلولو ډډه وکړه. د تركيې ولسمشر هغه پر مخ له څپېړې وهلو وروسته د خپل لاس ښکلولو ته اړ كړ.
که څه هم د مشرانو د لاسونو ښکلول په ترکیه کې یو له عامو دودونو څخه دی، خو اردوغان د ټولو د سترګو په وړاندې د یوه ماشوم په څپېړه وهل له پراخو غبرګونونو او نیوکو سره مخ شول.
په ټولنیزو رسنیو کې ځینو ترکي کاروونکو د ماشوم پر وړاندې د اردوغان چلند «تاوتریخوالی» وباله او د هغه دا کار یې وغانده.
د ترکیې خبري رسنۍ (هولک) د ماشوم په وړاندې د اردوغان چلند «خواشینونکی» بللی دی.
د اردوغان دا چلند بې مخینې نه دی. تر دې مخکې، په یوه بل پروګرام کې، هغه ورو ورو د یوه ماشوم سر ووهلو چې هڅه یې کوله له مایکروفون سره یې تړاو پرې کړي، چې له پراخو غبرګونونو سره مخ شو.
متحده ایالاتو د جولای په ۱۰ مه ویلي وو، چې دوی به په ۲۰۲۶ کال په جرمني کې د اوږد واټن ویشتونکو توغندیو ځای پر ځای کول پیل کړي.
امریکا وايي، چې دا کار به د اوږدې مودې لپاره کوي او په دغه توغندیو کې اس-ام ۶ توغندي، توماهاوک کروز توغندي او پرمختللې هایپرسونیک وسلې شاملې دي.
پوتین چې د روسیې، چین، الجزایر او هند سمندري ځواکونو ته چې د پخوانۍ امپراتورۍ په پلازمېنه سنټ پیټرزبرګ کې د روسیې د سمندري ځواکونو د ورځې په نمانځغونډه کې وینا کوله، متحده ایالاتو ته خبرداری ورکړ، چې په دې اقدام سره به د سړې جګړې په بڼه د توغندیو د کړکېچ لامل شي.
پوتین وویل: "زموږ په خاوره کې د داسې توغندیو هدفونو ته د الوتنې وخت به چې ممکن په راتلونکي کې په اټومي وسلو سمبال وي شاوخوا ۱۰ دقیقې وي."
هغه زیاته کړه، چې د امریکا توغندي ښايي په راتلونکي کې په اتومي وسلو سمبال شي او د روسیې په خاوره کې د دغو توغندیو له خوا د موخو ویشتل به ۱۰ دقیقې وخت ونیسي.
پوتین چې په ۲۰۲۲ کال کې یې پر اوکراین یرغل کړی، دغه جګړه له لویدیځ سره د یوې تاریخي مبارزې د یوې برخې په توګه مطرح کوي، چې د ده په خبره په ۱۹۹۱ کال کې د شوروي اتحاد له نسکورېدو وروسته روسیې ته یې سپکاوی کړی او د مسکو د نفوذ ساحه یې تر پښو لاندې کړې ده.
اوکراين او لويديځ وايي؛ پوتين په امپرياليستي بڼه د ځمکو په لاندې کولو کې لاس لري.
دوی ژمنه کړې، چې روسیې ته به ماتې ورکړي چې دا مهال د کریمیا په ګډون د اوکراین شاوخوا ۱۸ سلنه خاوره او د اوکراین په ختیځ کې د څلورو سیمو ځینې برخې په واک کې لري.
روسیه وايي؛ هغه ځمکې چې یو وخت د روسیې د امپراتورۍ برخه وه، اوس یو ځل بیا د روسیې برخه ده او هېڅکله به بېرته نه ورکول کېږي.
د روسیې د بهرنیو چارو مرستیال وزیر سرګي ریابکوف د جولای په ۲۱مه ګواښ وکړ، چې مسکو به په جرمني کې د اوږد واټن ویشتونکو توغندیو د ځای پرځای کولو په اړه د واشنګټن پلان ته "پوځي ځواب" ورکړي.
په سنټ پیټرزبرګ کې د خپلې وینا په دوام پوتین وویل، چې مسکو په اروپا او د نړۍ په نورو برخو کې د امریکا او د هغې د "متحدینو" فعالیتونو په اړه غور کوي او د هغې پر بنسټ به "متقابل اقدامات" وکړي.
د هغه په وینا؛ واشنګټن کړکېچ ته لمن وهي او تر دې وړاندې یې ډنمارک او فیلیپین ته څو توغندي استولي دي.
ټانکونو د غزې په سوېل کې د خان یونس په ختیځ کې د الکرارا، الزنا او بني سهیل په درېیو ښارونو کې لا نورې سیمې نیولي او ډاکټرانو ویلي، چې لږ تر لږه نهه فلسطینیان د یکشنبې په ورځ د اسراییلي ځواکونو په بریدونو کې په دغو سیمو کې وژل شوي دي.
د سیمې اوسېدونکو ویلي، چې د خان یونس په ختیځو سیمو کې چیرې چې پوځي عملیات روان دي، د سختې جګړې غږ اورېدل کېږي.
نوې جګړې د دې لامل شوي، چې په زرګونو نورې کورنۍ خپل کورونه پرېږدي او لویدیځ ته المواسي او شمال ته د دیر البلاح په لور د ګڼې ګوڼې سیمو ته لاړ شي.
د یکشنبې په ورځ په خان یونس باندې دوه جلا اسراییلي هوایي بریدونو کې لږ تر لږه ۱۵ فلسطینیان وژل شوي دي.
د الموصې سیمې په خیمو یو هوایي برید د ماریا ابو زیاده په نوم د یوې څلور میاشتینۍ ماشومې په ګډون پنځه تنه وژلي دي.
د خان یونس په لوېدیځ کې الموصي هغه سیمه ده، چې امنه اعلان شوې ده او اسراییلي پوځ له نورو ځایونو څخه فلسطینیانو ته دغې سیمې ته د ورتګ امر کوي.
د اسراییل پوځ ویلي، چې په دې سیمې د شوي برید په اړه څېړنې کوي.
د غزې روغتیايي چارواکي وايي، چې د خان یونس ښار په مرکز کې پر یو کور هوايي برید ۱۰ کسان وژلي دي.
په تېرو څو ورځو کې د اسراییل پوځ ویلي وو، چې په ختیځ خان یونس کې یې له دغو سیمو څخه د راکټي بریدونو په ګډون د نویو بریدونو په ځواب کې او د حماس د بیا تنظیمېدو د مخنیوي په موخه تازه بریدونه کړي دي.
دغه پوځ وايي، چې په سیمه کې یې لسګونه وسله وال وژلي او پوځي تاسیسات یې ویجاړ کړي دي.
په همدې حال کې د مصر پولې ته څېرمه په رفح ښار کې اسراییلي ځواکونو د ښار په شمالي برخو کې ژور پرمختګ کړی، چیرته چې دوی لا تر اوسه بشپړ کنټرول نه لري.
ټانکونو د غزې د مرکزي تړانګې په ځینو سیمو لکه؛ د بوریج کمپ، نصرت کمپ او د جوهر الدیک کلي هم په نښه کړی دی.
د غزې د ښار په تل الحوا کې چیرې چې د حماس وسله والې څانګې ویلي، چې جنګیالیو یې هلته د اسراییلي ځواکونو سره جګړه کړې، د اسراییل په هوايي برید کې څلور فلسطینیان وژل شوي دي.
تمه وه، چې د یکشنبې په ورځ د امریکا د استخباراتو ادارې سي ای اې مشر ویلیم برنز په روم کې له خپلو اسراییلي او مصري سیالانو او د قطر له صدراعظم سره په غزه کې د اوربند او د حماس له خوا د یرغمل شویو بندیانو د خلاصون په اړه خبرې وکړي.
حماس په غزه کې د جګړې د پای ته رسولو لپاره د اوربند تړون غواړي، په داسې حال کې چې د اسراییلو لومړي وزیر بنیامین نتنیاهو ژمنه کړې چې جګړه به یوازې هغه وخت ودریږي، چې حماس به بشپړه توګه مات شي.
د اسراییل ډولتي ټلویزیون کان وايي، چې د وروستي وړاندیز په اړه د اسراییل ځواب د شنبې په ورځ واشنګټن ته سپارل شوی و، دا د یوې موافقې د ترلاسه کولو وروستۍ هڅه وروسته له هغې چې اسراییل او حماس یو بل د کړکېچ لپاره تورنوي.
د سیمه ییزو روغتیايي چارواکو په وینا؛ په غزه کې د اسراییل په عملیاتو کې تر ۳۹۰۰۰ زیات فلسطینیان وژل شوي دي.
اسراییل وايي، چې د غزې په جګړه کې یې ۳۲۸ سرتېري وژل شوي.
دوی وايي، چې د اسراییل د خونړیو بریدونو د پیل راهیسې په غزه کې د وژل شوو کسانو درېیمه برخه د حماس جنګیالي جوړوي.
د اسراییل د شمېرو له مخې؛ د اکتوبر د اوومې په برید کې شاوخوا ۱۲۰۰ کسان وژل شوي او ۲۵۰ تنه یرغمل شوي وو.
حزب الله په مجدال شمس باندې د برید مسولیت په غاړه نه دی اخیستی، دغه برید د اکټوبر د اوومې نېټې راهیسې په اسراییل یا د اسراییل سره ضمیمه شویو سیمو کې تر ټولو خونړی برید دی.
پر اسراییل د حماس له برید وروسته په غزې کې د اسراییل پیل شوي بریدونه له نهو میاشتو راهیسې دوام لري او اوس د پراخې سیمه ییزې شخړې د خپرېدو خطر لري.
اسراییلي الوتکو تېره شپه د لبنان په سویل کې یو شمېر موخې په نښه کړي؛ خو د اسراییل د امنیتي کابینې تر غونډې وروسته د قوي غبرګون تمه کیږي.
لومړی وزیر بنیامین نتنیاهو د امریکا له سفر څخه بیرته ستون شوی او تر غونډې مخکې یې له امنیتي چارواکو سره کتلي دي.
د امریکا د بهرنیو چارو وزیر انتوني بلېنکن وویل، چې داسې نښې نښانې شته چې د فوټبال پر یو لوبغالي راکټي برید، د حزب الله له خوا شوی وي.
هغه وايي، چې واشنګټن به اسراییل سره ودریږي چې له ځانه دفاع وکړي.
د نوموړي په وینا؛ متحده ایالات نه غواړي جګړه نوره هم پراخه کړي، خو دا په داسې حال کې ده چې هره ورځ د لبنان په سویلي سیمو کې د اسراییلي پوځ او حزب الله جنګیالیو ترمنځ د هوايي بریدونه او د ډزو تبادله لیدل کیږي.
په ورته وخت کې کورنۍ د ګولان په لوړو کې د مجدال شمس په دروز کلي کې د جنازې لپاره راټولې شوې، هغه سیمه چې د ۱۹۶۷ کال د منځني ختیځ په جګړه کې د سوریې له خوا نیول شوې وه او د ډیرو هېوادونو له خوا په رسمیت نه وه پېژندل شوې.
دروز عرب لږکي مسلمانان دي، چې د ګولان په لوړو کې د ۴۰ زره نفوس له نیمایي څخه ډیره برخه جوړوي.
د مجدال شمس د محلي شورا مشر دولان ابو صالح په اسراییلي ټلویزیون کې په خپرو شویو څرګندونو کې وویل: "موږ سختې شېبې تېروو.
د مجدال شمس لپاره یوه سخته غمیزه توره ورځ راغلې ده."
حزب الله په پیل کې اعلان کړی و، چې د ګولان په لوړو کې یې د اسراییل پر پوځي مرکزونو توغندي توغولي؛ خو پر مجدال شمس په برید کې یې لاس لرل رد کړي او ویلي یې دي، چې «له دې پېښې سره هېڅ تړاو نه لري او په دې اړه ټول درواغجن تورونه په کلکه ردوي».