ایراني پولیسو ټولنیزه افغانه څېړونکې کبرا غلامي د ایران پاسپورټ ادارې ته وربللې او وروسته یې له دې امله له خپلې خاورې اېستې ده، چې د دوی د خوښې حجاب ته یې پاملرنه نه کوله.
داسې ویل کېږي، چې نوموړې په ایران کې د پاتې کېدو ټول قانوني اسناد هم لرل.
د خواله رسنیو یو شمېر کاروونکو او د کبرا غلامي خواخوږو ویلي، چې دغه افغانه څېړونکې د پنجشنبې په ورځ (د زمري په ۱۱مه نېټه) له هغې وروسته چې د خپل حجاب د وضاحت ورکولو په اړه یې څو پیغامونه تر لاسه کړل؛ نو د پاسپورټ دفتر ته ور وبلل شوه، وروسته پولیسو ونیوله او هغه یې د کورنۍ له نورو غړو پرته د څو ساعتونو په ترڅ کې له ایرانه واېستله.
د خواله رسنیو کاروونکو د «#کبرا_به بېرته_راستنه کړو» د هشتګ په کارولو سره خپلې اندېښنې شریکې کړې او بېرته یې ایران ته د هغې د ستنولو غوښتنه کړې.
د خواله رسنیو یوې ایرانۍ کاروونکې شیما واعظي په خپله اېکس پاڼه لیکلي: «دا مهال کبرا په موټر کې ده او په دې نه ده توانېدلې، چې د خپلو دوستانو او د کورنۍ له غړو سره خدای په اماني وکړي. هغې په ایران کې د اوسېدو لپاره ټول قانوني اسناد لرل او د الزهرا په پوهنتون کې یې د ماسټرۍ لوړې زدهکړې هم کړې وې.»
کبرا غلامي تېر کال په ایران کې یوې ټولنیزې - فرهنګي غونډې ته چې د «مېرمنو د فرهنګي او ټولنیز پرمختګ» تر سر لیک لاندې جوړه شوې وه په ایران کې یې «د افغان مېرمنو سره د ظلم او زور زیاتي» په اړه وینا وکړه او په خپلو خبرو کې یې له افغان مېرمنو سره د ایراني چارواکو د نارواو په اړه سختې نیوکې هم کړې وې.
