د طالبانو د ریاست الوزراء سیاسي مرستیال په دوحه کې د حماس له مخکښ غړي خالد مشعل سره کتلي دي. د طالبانو تر واک لاندې ارګ د یوې خبرپاڼې په خپرولو سره ویلي، چې مولوي عبدالکبیر په دې کتنه کې له نوموړي سره د هنیه د وژل کېدو له امله غمشریکي کړې ده.
په خبرپاڼه کې دغه راز راغلي، چې ښاغلي کبیر د هنیه له مرستیال موسی ابو مرزوق او د هغه له زوی عبدالسلام اسماعیل هنیه سره هم کتلي دي.دا په داسې حال کې ده، چې د اسماعیل هنیه د جنازې د مراسمو په څنډه کې د طالبانو بل غړي انس حقاني هم له خالد مشعل سره کتلي دي.دا په داسې حال کې ده، چې د طالبانو تر واک لاندې باختر خبري اژانس بیا د سپوتنیک خبري اژانس له قوله خبر ورکړی، چې خالد مشعل د اسماعیل هنیه له ترور کېدو وروسته د هغه د ځای ناستي په توګه ټاکل شوی دی.خو حماس بیا تراوسه په دې اړه په رسمي توګه څه نه دي ویلي.د ویلو ده، چې مشعل تر هنیه مخکې هم د حماس د سیاسي دفتر مشر او له مهمو غړو څخه و او په ٢٠١٧ کال کې یې دا دنده اسماعیل هنیه ته پرېښی وه.تر دې وړاندې رویټرز خبري اژانس هم د حماس د یوشمېر چارواکو او کارپوهانو له قوله لیکلي و، چې د اسماعیل هنیه اصلي ځای ناستی به خالد مشعل وي.د حماس د سیاسي دفتر مشر اسماعیل هنیه چې څو ورځې وړاندې په تهران کې ترور شو، د جنازې مراسم یې نن په قطر کې ترسره شول.په دې مراسم د یو شمېر اسلامي هېوادونو د مشرانو سربېره د طالبانو د ریاست الوزراء سیاسي مرستیال او مل پلاوي هم ګدون کړی و.په ایران کې د اسماعیل هنیه ترور نړۍوال غبرګونونه را پارولي او ګڼو اسلامي هېوادونو دغه برېد غندلی.بل خوا د نړۍ یو شمېر هېوادونونو بیا خبرداری ورکړی، چې دا به په منځني ختیځ کې روان کړکېچ لا پراخ کړي.
