پر غزې د اسراییل د بریدونو ۶۹ سلنه قربانیان ښځې او ماشومان دي. یو شمېر ایراني رسنیو د غزې د رسنیو د دفتر له قوله لیکلي، چې له تېر نږدې یو کال راهیسې پر غزې د اسراییل د بریدونو له امله ۲۷ زره او ۲۹۴ ښځې او ماشومان وژل شوي دي.
د راپورونو له مخې، په یاد شمېر کسانو کې ۱۶ زره او ۳۱۴ تنه یې ماشومان او ۱۰ زره او ۹۸۰ نور یې ښځې دي.
د سیمه ییزو روغتیايي چارواکو په خبره؛ په غزه کې د اسراییل د عملیاتو له پیل راهیسې په ټوله کې نږدې ۴۰ زره فلسطینیان وژل شوي دي.که څه هم د بشري حقونو نړۍوالو بنسټونو په وار وار له اسراییل څخه غوښتي، چې ملکي کسان په نښه نه کړي، خو اسراییل بیا وایي، چې اورپکي د عامو خلکو منځ کې ځای پر ځای کیږي.اسراییلي ځواکونو چې اوسمهال جګړو ته زور ورکړی، د غزې تړانګې په سوېل کې یې لا ډېرې سیمې نیولي دي.د راپورونو له مخې، د جګړو شدت د دې لامل شوی، چې په زرګونه فلسطیني کورنۍ د خپلو کورونو پرېښودو ته مجبوره شي.مخکې داسې راپورونه هم خپاره شوي و، چې ۲،۳ میلیونه فلسطینیان له خپلو کورونو بې ځایه شوي دي.سره له دې چې حماس د دې جګړو د پای ته رسېدو لپاره د اوربند هڅه کوله، خو د اسماعیل هنیه په وژل کېدو سره دا وېره زیاته شوې، چې جګړه به لا پسې وغځیږي.له دې سره، د اسراییلو لومړي وزیر بنیامین نتنیاهو بیا په وار - وار سره ویلي، چې جګړه به یوازې هغه وخت ودریږي، چې حماس په بشپړه توګه مات شي.
