نړۍوال بانک د افغانستان لپاره نوی مشر ګومارلی دی
نړۍوال بانک ویلي، چې د افغانستان لپاره د دغه بانک د پخوانۍ مشرې ملېندا ګود پر ځای یې فاریس حداد زیروس ټاکلی چې تېره ورځ یې کار پیل کړ.
نړۍوال بانک ویلي، چې د افغانستان لپاره د دغه بانک د پخوانۍ مشرې ملېندا ګود پر ځای یې فاریس حداد زیروس ټاکلی چې تېره ورځ یې کار پیل کړ.
نړۍوال بانک د یوې خبرپاڼې په خپرولو سره ویلي، چې حداد زیروس تر دې وړاندې په مالدیف، نیپال او سریلانکا لپاره د نړۍوال بانک د مشر په توګه دنده ترسره کړې ده.
حداد زیروس د متحده ایالاتو تابعیت لري او له ۱۹۹۶ راهیسې له نړۍوال بانک سره یې په بېلابېلو برخو کې کار کړی دی او د بانکولۍ په برخه کې زیاته تجربه لري.
د هغې خبر پاڼې له مخې چې د نړۍوال بانک لهخوا خپره شوې د حداد زیرووس له قوله په کې ویل شوي، چې د نوموړي لومړیتوب به د افغانانو د هوساینې، د هغوی د روغتیا، ښوونې روزنې، د خوړو خوندیتوب او په راتلونکې کې د ښځو او نجونو په ډاډمنتیا راټول وي.
هغه د خصوصي سکټور او کوچنیو او منځنیو تصدیو په ځانګړې توګه د ښځو لهخوا د کارموندنې او هر اړخیزې ودې د پیاوړتیا په برخه کې د ملاتړ پر اهمیت هم ټینګار کړی.
په همدې حال کې د طالبانو حکومت په افغانستان کې د نړۍوال بانک د دفتر د نوي رییس د ټاکل کېدو هرکلی کړی او ویلي یې دي، چې دغه بانک باید په افغانستان کې د خپلو نیمګړو پروژو کار بیا له سره پیل کړي.
د اقتصادي چارو کارپوهان وايي، سره له دې چې د افغانستان پر بانکي سیسټم نړۍوالو بندیزونو ناوړه اغېزې پرې اېستې دي؛ خو که چېرته د نړۍوال بانک په څېر نورې نړۍوالې ادارې په دغه هېواد کې نوې پروژې پیلوي، نو له شک پرته به د دغه هېواد د خلکو په ویجاړ اقتصادي حالت کې څه نا څه بدلون راولي؛ خو د دغو کارپوهانو په وینا دا کار به هله ښې پایلې ولري، چې طالبان له خپل دریځه څه نا څه په شا شي او بشري حقونو په تېره بیا د ښځو او نجونو حقونو ته پاملرنه وکړي.
