د طالبانو د کورنیو چارو وزارت ویاند وایي، چې په ټول هېواد کې به په نږدې وخت کې د الیکترونیکي لایسنسونو د ورکړې لړۍ پیل شي. عبدالمتین قانع پر اېکس خواله رسنۍ لیکلي، چې دغه برېښنایي لایسنسونه به په نړۍوالو سټنډرډونو برابر او د غیر قانوني لایسنسونو مخه به ونیول شي.
د نوموړي په خبره، د دغې لړۍ په پیلېدو سره به د ترافيکي پيښو د مخنيوي ترڅنګ د ترافيکو په برخه کې ډېر نور مثبت بدلونونه هم رامنځته شي.
د طالبانو د اقتصادي کمېسیون تخنیکي کمېټې دا پرېکړه د روان کال په غویي میاشت کې کړې وه او ویلي یې و، چې د ترافیکو عمومي ریاست دې د دغې ډلې د کورنیو چارو وزارت سره په همغږۍ ژر تر ژره د عامه او خصوصي مشارکت له لارې د جواز سیر او لایسنس برېښنايي کېدو پروسه پيل کړي.
دا په داسې حال کې ده، چې د طالبانو د ریاستالوزرا اداري مرستیال عبدالسلام حنفي څه موده وړاندې ویلي و، چې په دولتي ادارو کې باید کاغذي سیسټم له منځه ولاړ او برېښنايي سیسټم دود شي.
نوموړي دغه راز زیاته کړې وه، چې په هېواد کې د برېښنایي حکومتولۍ د ودې لپاره هڅې روانې دي.
که څه هم په تېر نظام کې د حکومتولۍ ډېرې چارې برېښنایي شوې وې، خو دغه پروسه د جمهوریت له سقوط سره نیمګړې پاتې شوه.
پخواني ولسمشر اشرف غني بیا په یوې مرکه کې امریکا او ملګري ملتونه په دې تورن کړي، چې د دولتي ادارو «د ډیجیټل کېدو مخه یې نیولې وه» او دا په حکومتي چارو کې د فساد اصلي لامل و.
پر افغانستان د طالبانو له واکمنۍ وروسته اندېښنه او پوښتنه دا ده، چې د دغې ډلې ډېری لوړپوړي چارواکي او ماموران چې د شل کلنو جګړو له امله یوازې له مدرسو فارغ دي او له ډیجیټلي سیسټم سره نااشنا دي، څنګه کولی شي برېښنایي حکومتولي رامنځته کړي.
