د طالبانو د کرنې او مالدارۍ وزارت اعلان وکړ، چې له کروندګرو څخه به اضافي غنم اخلي او د بازار د نرخ د کنټرول لپاره به یې ذخیره کوي. دغه وزارت وايي، چې اضافي غنم به په سېلوګانو کې ذخیره کړي او د بیې د لوړېدو او هم د بېړنیو حالاتو په صورت کې به بازار ته وړاندې شي.
د طالبانو د کرنې او مالدارۍ وزارت ادعا کوي، چې د افغانستان په ۱۳ ولایتونو کې ۳۸۸۰۰ مټریک ټنه اضافي غنم موجود دي.
د دغه وزارت د معلوماتو له مخې؛ کندوز، تخار، بدخشان، سمنګان، کندهار، هرات، فراه، بلخ، سرپل، فاریاب، نیمروز او بادغیس ولایتونه د اضافي غنمو د تولید ظرفیت لري.
دغه وزارت وايي، چې د دغه وزارت د مالي او اداري مرستیال تر څارنې لاندې د اړوندو ادارو د استازو په ګډون یوه کمېټه جوړه شوې، چې د دغو ولایتونو له کروندګرو غنم واخلي.
د طالبانو د کرنې وزارت په داسې حال کې په ولایتونو کې د زیاتو غنمو د شتون او د هغې د اخیستلو او ذخیره کولو خبر ورکوي، چې اوس مهال افغانستان له قرغزستان څخه غنم او اوړه واردوي.
د افغانستان کرېکټ بورډ وایي، چې د شپږېزې کرېکټ نهم پړاو سیاليو لپاره یې د هرې لوبډلې نوملړ او لوبډلمشران اعلان کړل. راشدخان، حشمت الله شهيدي، ابراهيم ځدران، رحمت شاه زرمتی او عظمت الله عمرزی لوبډلمشران ټاکل شوي دي.
د افغانستان کرېکټ بورډ د یکشنبې په ورځ (د زمري ۱۴مه) د شپږيږې کرېکټ نهم پړاو سياليو کې د پنځو لوبډلو لپاره د لوبغاړو نوملړ اعلان کړ.
په دې سياليو کې د افغانستان د ملي لوبډلې د شل اوريزو سياليو لوبډلمشر راشد خان د سپين غر پړانګانو، د ملي لوبډلې د يو ورځينو او ټېسټ سياليو لوبډلمشر حشمت الله شهيدي د بند امير ښامارانو، د شل اوريزو سياليو مرستيال لوبډلمشر ابراهيم ځدراڼ د مس عينک اتلان، د یو ورځينو سياليو مرستيال لوبډلمشر رحمت شاه زرمتی د بوست ساتوونکو او د ملي لوبډلې الرونډر عظمت الله عمرزی د امو نهنګانو لوبډلمشران ټاکل شوي دي.
دغه سيالې به ۱۴ ورځي دوام وکړي، چې لومړۍ لوبه به یې د روانې اګست میاشتې په ۱۲مه پیل او د همدې میاشتې تر ۲۵مې نېټې به دوام ولري.
د افغانستان کرېکټ بورډ د معلوماتو له مخي، چې په دغو سیالیو کې پنځه لوبډلې به د یو بل پر وړاندې ولوبېږي.
د شپږيزې کرېکټ سياليو ټولې سيالۍ د کابل په کرېکټ لوبغالي کې کيږي.
د شپږېزې کرېکټ نهم پړاو سیاليو د لوبغاړو نوملړ:
سپین غر پړانګان
راشد خان لوبډلمشر، رحمان الله ګربز مرستیال لوبډلمشر او ویکټ ساتونکی، حسن عیسی خېل، عمران میر، سمیع الله شینواری، بهیر شاه محبوب، الله نور ناصري، برکت الله کډاډا، اکرام علي خېل، طارق ستانکزی، عصمت عالم، ظاهر خان، وحیدالله ځدراڼ، عرب ګل مومند، یمین احمدزی، بلال سمیع، محمد ابراهیم عبدالرحیمزی او فریدون داودزی.
بند امیر ښاماران
حشمت الله شهیدي لوبډلمشر، نوین الحق مرستیال لوبډلمشر، محبوب تسکین ویکټ ساتونکی، صدیق الله اتل، ریاض حسن، اصف موسی زی، صدیق الله پاچا، علي احمد ناصر، کریم جنت، شمس الرحمن، ننګیال خروټی، امیر حمزه، الله محمد غضنفر، بابر خان، خلیل احمد، عبدالله احمدزی او نجات مسعود.
مس عینک اتلان
ابراهیم ځدراڼ لوبډلمشر، افسر ځاځی ویکټ ساتونکی، نوید عبید، وفي الله تره خېل، ناصر جمال، سبحان الله سینزی، رحمن الله ځدراڼ، یوسف شاه، محمد نبي، عبدالرحمن رحماني، مجیب الرحمن، ضیاءالرحمن اکبر، خلیل ګربز، عبدالله تره خېل، نوید ځدراڼ، نسیم منګل او یما عرب.
بست ساتونکي
رحمت شاه زرمتی لوبډلمشر، دروېش رسولي مرستیال لوبډلمشر، نعمان شاه ویکټ ساتونکی، حضرت الله ځاځی، محمد اکرم، بلال احمد ترین، نجیب الله ځدراڼ، اعجاز احمدزی، عبدالهادي، ګلبدین نایب، نور احمد، نصیر خان، عبدالباقي، فرید احمد ملک، ضیاءالرحمن شریفي، بشیر احمد او سمیع الله سرمست.
امو نهنګان
عظمت الله عمرزی لوبډلمشر، محمد اسحاق ویکټ ساتونکی، عبدالمالک، زیبد اکبري، محمد هارون، شاهدالله کمال، جاوید احمدزی، اعجاز احمد ازاد، حیات الله ناصري، مسعود ګربز، شرف الدین اشرف، جمعه ګل، قیس احمد، محمد الله لوګری، فضل الحق فاروقي، محمد سلیم ساپی، محمد ګل علیزی او کامل کاکړ.
په افغانستان کې واک ته د طالبانو له رسېدو وروسته دا لومړۍ ځل دی، چې د افغان کرېکټ ملي لوبډلې ټول لوبغاړي په کور دننه سيالیو کې برخه اخلي.
د شپږیزې کرېکټ لیګ لومړی پړاو سیالۍ په لومړي ځل په ۲۰۱۳م کال کې ترسره شوې.
د طالبانو د دفاع وزارت د عقيدتي او فرهنګي چارو او امربالمعروف رياست مشر وایي، چې نظامیان باید د دغه ډلې د رهبرۍ او مشرتابه اطاعت وکړي. سید اغا ابومقبل د دې ډلې د مشر هبت الله اخونزاده د «فرمانونو پر ښه عملي کولو» هم ټينګار کړی.
د طالبانو دفاع وزارت د يکشنبې په ورځ «د زمري ۱۴مه» په يوې اعلامیه کې ويلي، چې د دوی پوځي مسولينو د دفاع وزارت د عقيدتي، فرهنګي او امربالمعروف رياست لپاره سید اغا ابومقبل د نوي رییس په توګه معرفي کړ.
نوموړي د خپلې دندې په لومړۍ ورځ له خپلو نظامي طالبانو غوښتي، چې د «مشرتابه د هر ډول اوامرو په اطاعت کې باید خپلې هڅې درېغ نه کړو.»
ډېری کسان په دې باور دي، چې طالبان په خپلو نظامي روزنيزو مرکزونو کې تر ډېره «ديني، جهادي او افراطي» انګېزه خپروي او هڅه کوي، چې د خپلې ډلې مفکورې خپرې کړي.
د طالبانو د پوځ مسولين په داسې حال کې له خپلو نظامي کسانو څخه د «مشرتابه د اطاعت او امر منلو» خبره کوي، چې درې ورځې وړاندي په کندهار کې د «اسلامي اردو ۶۰۰ مسولينو اصلاحي غونډه» جوړه شوې وه او هبت الله هم له ټولو غوښتي و، چې «په قدرت مغروره نه شي او د اطاعت په وړاندې د بې روحه جسد په څیر و اوسي.»
ملا هبت الله دغو مسوولینو ته سپارښتنه کړې وه، چې د طالب مشرانونو فرمانونه ومني، ځکه د نوموړي په خبره دا د دوی لپاره جهاد دی.
له دې سره، د کندهار په غونډه کې د طالبانو د استخباراتو مشر هم ويلي وه، چې په افغانستان کې ګرمه او فزيکي جګړه پای ته رسېدلې؛ خو فکري او سړه جګړه لا هم دوام لري.
د ښځو په برخه کې د ۲۰۲۴ پاریس المپیک بایسکل ځغلونې سیالۍ نن یکشنبه ترسره کیږي. په دغې سیالۍ کې د بېلابېلو هېوادونو ۹۳ بایسکل ځغلونکې ګډون کې.
په نن سیالۍ کې د افغانستان په استازیتوب فریبا هاشمي او یلدوز هاشمي له خپلو سیالانو سره سیالي کوي.
د ۲۰۲۴ پاریس المپیک سیالیو لړ کې نن یکشنبه د ښځینه بایسکل ځغلونکو تر منځ د ۱۵۸ کیلومتره په واټن د بایسکل ځغلونې سیالۍ ترسره کیږي.
په دغو سیالیو کې د بېلابېلو هېوادونو ۹۳ بایسکل ځغلونکو ګډون کړی.
د افغانستان په استازیتوب دوه خویندو ۲۴ کلنې یلدوز هاشمي او ۲۲ کلنې فریبا هاشمي ګډون لري.
تر دې مهاله د ۲۰۲۴ پاریس املپیک سیالیو کې افغان لوبغاړو د پام وړ مقام نه دی ترلاسه کړی.
خو یلدوز هاشمي تېره اوونۍ د شنبې په ورځ هانګژو اسیایي سیالیو د ټایم ټرېل په انفرادي لوبو کې د خپلو سیالانو په وړاندې ولبېده او ۱۸،۳ کیلومټره لاره یې په ۲۷ دقیقو او ۱۴ ثانیو کې ووهله او د څوارلسو بایسکل ځغلونکو په منخ کې یې لسم ځای خپل کړ.
پاکستاني رسنیو راپور خپور کړی، چې د روان ۲۰۲۴ کال (د اګسټ تر درېیمې نېټې) له پاکستانه د ټولو ستنو شویو افغان کډوالو شمېر ۶۷۵۱۹۰ تنو ته رسېدلی او د ستنېدو لړۍ لاهم روانه ده.
راپور کې راغلي، د جولای له ۲۱مې نېټې څخه د اګسټ تر درېیمې نیټې پورې له ۱۵۵۳۷ افغانانو له ډلې ۶۳۴۵ یې نارینه، ۴۹۶۳ یې ښځې او ۴۲۲۹ یې ماشومان وو، چې خپل هېواد ته بېرته ستانه شوي دي.
د راپور له مخې، دغه ۴۲۱ کورنۍ افغانستان ته په ۴۸۹ موټرو کې ستنې شوې دي.
دغه شمېرې پاکستاني چارواکو داسې مهال خپرې کړې دي چې د افغان کډوالو د ایستلو دویم پړاو پیل شوی او دا مهال د دغه هیواد په بېلابېلو سیمو کې د افغان کډوالو نیول او ایستل روان دي.
پاکستاني چارواکو مخکې ويلي وو، که دغه کډوال په خپله خوښه ونه وځي؛ نو د دوی د نیولو او شړلو له ګواښ سره مخامخ شي.
په ملګرو ملتونو کې د پاکستان استازي منیر اکرم په تېره چنګاښ میاشت کې ويلي و، چې له تېرو ۴۰ کلونو راهیسې یې هېواد د پنځه مېلیونو افغان کډوالو کوربهتوب کړی چې ۱.۴ مېلیونه یې راجستر شوي، چې پاتې یو مېلیون نا راجستر شوي او په زرګونه بې اسناده کډوال لاهم په پاکستان کې مېشت دي.
نوموړي هیله څرګنده کړې وه، چې ۱.۴ مېلیونه راجستر شوي کډوال به هم ډېر ژر بېرته خپل هېواد ته ستانه شي.
پاکستاني چارواکو ویلي چې دغه لړۍ روانه ده او دوی په پام کې لري چې د استوګنې له اسنادو پرته افغان کډوال له پاکستانه وباسي.
د افغان کډوالو د نیولو په بهیر کې پاکستاني پولیسو په تېرو څو ورځو کې ۱۵۰ تنه افغان کډوال یوازې په اسلام اباد کې نیولي او ځینې هغه یې له دغه هیواده په زور ایستلي دي.
د ایران د بشري حقونو سازمان وايي، د روان میلادي کال په لومړیو اوو میاشتو کې ایران ۳۰۰ کسان په دار کړي چې ۲۰ افغانان دي. دغه سازمان په خپل وروستي راپور کې ویلي، چې یوازې په جولای میاشت کې د ایران حکومت له لوري ۴۹ کسان په دار ځړول شوي.
یاد سازمان له ایران څخه بهر فعالیت کوي.
له بهره فعالیت کوونکی د ایران د بشري حقونو سازمان د شنبې په ورځ په خپل وروستې راپور کې ویلي، چې د روان میلادي کال په لومړنیو اوو میاشتو کې د ایراني حکومت له لوري ۳۰۰ کسان په دار شوي چې په دغو کسانو کې ۲۰ تنه یې یوازې افغانان وو.
د ایران بشري حقونو سازمان وايي:«چې په دار شویو کسانو کې ۴۲ بلوڅان، ۲۰ کردان، ۲۰ افغانان او ۱۵ ښځې هم شاملې وې.»
په راپور کې ویل شوي، چې په دار ځړول شویو کسانو کې په ۱۷۲ تنو باندې د نشه یې توکو د قاچاقو تور وو.
راپور زیاتوي چې د تېر کال د لومړیو اوو میاشتو پرتله په ایران کې د اعدام سزا ورکول کم شوي، او په ایران کې پارلماني او د ولسمشرۍ ټاکنې او د دغه هېواد د پخواني ولسمشر ابراهیم رییسي وژنه یې لامل ښودل شوې.
د دغه سازمان مشر، محمود امیري مقدم وايي: «موږ په ځانګړې توګه په راتلونکو اونیو او میاشتو کې د کرد مدني فعالانو او د نشه یي توکو په جرمونو د تورنو کسانو د اعدامونو د نوې څپې په اړه اندیښمن یو. یوازې د مدني ټولنې د اعتراضونو او نړیوالو فشارونو له لارې د اعدامونو د دې څپې مخه نیول کېدای شي.»
د ایران د بشری حقوقو سازمان د ایران په زندانونو کې د اعدام د حکمونو د پلي کولو د شدت په وړاندې خبرداری ورکړی او په دغه هیواد کې د اعدامونو موضوع ته د نړیوالې ټولنې او عامو خلکو د خاصې پاملرنې غوښتنه کوي.
تر دې مهاله د طالبانو حکومت د ایراني حکومت له لوري د ۲۰ تنو افغانانو په دار ځړولو په اړه څه نه دي ویلي.