د طالبانو د ویاند مرستیال وایي، چې په افغانستان کې له درېیو کلونو راهیسې داسې امنیت ټینګ شوی، چې په نیمه پېړۍ کې نه و رامنځته شوی. هغه زیاتوي؛ ځینې استخباراتي شبکې غواړي افغانستان نړۍ ته ناامنه وښيي.
حمدالله فطرت د طالبانو تر واک لاندې ملي ټلویزیون ته ویلي، چې د افغانستان امنیت ته په کتو سره ډېریو هېوادونو بیا ځلې په هېواد کې خپلې سفارتخونې فعاله کړي دي.
نوموړي د هغې پوښتنې په ځواب کې چې ولې تر اوسه د نړۍ هېڅ یوه هېواد افغانستان په رسمیت نه دی پېژندلی وویل: «ځيني استخباراتي جهتونه په قصدي توګه غواړي افغانستان نړۍ ته نا امنه هېواد معرفي کړي او په دې اړه ناسم راپورونه نړۍوالو ته وړاندې کوي.»
ښاغلي فطرت دا روښانه نه کړه، چې د کومو هېوادونو استخبارات افغانستان نړۍوالو ته ناامنه معرفي کوي.
د طالبانو د مرستیال ویاند همداراز زیاتوي، چې د افغانستان د امنیتي وضعیت په اړه د سیمې د هېوادونو په ګډون د نړۍوالو اندېښنې بې ځایه دي او وایي، چې له افغانستانه نورو هېوادونو ته هیڅ کوم ګواښ نه شته.
حمدالله فطرت په ټينګار سره وویل، چې افغانستان اوسمهال په نړۍ کې ۴۰ فعاله سیاسي استازولۍ لري او طالبان د سیمې په ګډون له ټولو اسلامي هېوادونو ښې سره اړیکې لري.
نوموړي په افغانستان کې د سعودي عربستان د سفارت پرانیستو ته په اشارې سره وویل، چې ډېر ژر به نور هېوادونه هم په افغانستان کې خپلې سفارتخونې پرانیزي.
دا په داسې حال کې ده، چې د امریکا د بهرنیو چارو وزارت مرستیال ویاند دوه ورځې وړاندې وویل:« موږ له افغانستانه د بهرنیو ګواښونو د بیا راڅرګندېدو د مخنیوي لپاره کار کوو.»
ودانټ پټېل په یوې خبري ناسته کې په افغانستان کې د ترهګریزو ډلو په اړه د ملګرو ملتونو د راپور په تړاو د یوې پوښتنې په ځواب کې وویل؛ هڅه کوي ډاډ ترلاسه کړي، چې افغانستان هېڅکله د امریکا یا د متحدینو په وړاندې یې د ترهګريزو بریدونو په ګواښ بدل نه شي.
د ښاغلي پټېل په خبره، داعش یوه نړۍواله ترهګره شبکه ده چې د نړۍوالو ترهګریزو بریدونو د ترسره کولو هوډ او وړتیا لري.
بل خوا د امریکا د ولسي جرګې د بهرنیو اړیکو د کمېټې مشر مایکل مککال هم مخکې اندېښنه څرګنده کړې وه، چې د امریکا له وتلو او د افغان حکومت له پرځېدو وروسته په «زرګونه ترهګر» له بندخونو وتښتېدل او په نورو هېوادونو کې د داعش په بریدونو کې مرسته کوي.
فطرت بیا د نوموړي د خبرو په غبرګون ویلي و، چې داعش ډله په افغانستان کې په بشپړه توګه له منځه تللې ده.
د نوموړي په وینا؛ داعش ډله په افغانستان کې د امریکایانو په شتون کې ځواکمنه شوې وه، ځالې یې درلودې او همدا راز یې سربازګیري هم کوله.
د افغان کډوالو د لوبډلې مشرې معصومه علیزاده د سرو زرو د ۲۳ مډالونو ګټونکي مایکل فلپس او د المپیک د سرو زرو د ۹ مډالونو ګټونکي کارل لوييس ته هم جایزې ورکړل شوې.
د ګالا اتلولۍ په مراسمو کې دورزش مخکښو څهرو لکه ارسن وینګر، د فرانسې د ملي المپیک کمیټې مشر کارل لوییس، مایکل فلپس، د افغانستان، اوکراین او فلسطین ښځینه لوبغاړو ګډون کړی و.
په دې مراسمو کې معصومه علیزاده، ذکیه خدادادي، فریبا، یولدوز هاشمي، کیمیا یوسفي او نورو افغان ورزشي شخصیتونو هم برخه اخيستې وه.
کیمیا یوسفي او معصومه علیزاده د «ګالا اتلولۍ» په مراسمو کې نړۍ ته د افغان ښځو د غږ رسولو په موخه خبرې وکړې.
معصومه علیزاده د امریکا د مشهورې اداکارې شارون اسټون څخه خپله جایزه ترلاسه کړه.
اسټون په ۱۹۹۰ کلنو کې د امريکايي هنر یو زړه راښکونکی سمبول و او د هنر ډېرې جايزې يې ګټلي دي.
د ګالا اتلولۍ سازمان دغو لوبغاړو ته د ورزش څخه بهر د دوی د کار او د دوی د خیریه او بشردوستانه فعالیتونو لپاره ستاینلیک ورکړ.
کارل لويیس د تاریخ تر ټولو لوی منډه جوړونکی او د المپیک د سرو زرو د ۹ مډالونو او ۸ نړۍوالو سرو زرو مډالونو ګټونکی، مایکل فلپس، د المپیک ۲۳ د سرو زرو مډالونه او په ټولیز ډول د المپیک او نړیوالو اتلولیو ۶۶ د سرو زرو مډالونه ګټونکی او معصومه علیزاده د المپیک په لوبو کې د افغان کډوالو د لوبډلې مشره ده، چې د نړۍ له سل میلیونو څخه ذ زیاتو جبري کډوالو استازیتوب کوي، په دې مراسمو کې ګډون درلود.
شارون اسټون، چې په دې مراسمو کې حاضره وه په بېلابېلو مواردو کې بشري فعالیتونه او کارونه کوي.
د مراسمو څخه د خپور شوي متن له مخې؛ د ټولې نړۍ لوبغاړي د ورزش د ارزښتونو لکه عادلانه لوبې، زغم، د اولمپیک نظریاتو او سولې ته وده ورکولو لپاره سره راټول شوي.
