د بنګله دېش لومړۍ وزیرې شېخ حسینه له خپلې دندې استعفا وکړه او هېواد یې پرېښود.
د راپورونو له مخې، نوموړې له هغه وروسته استعفا وکړه، چې یو شمېر معترضان یې کور ته ننوتل.
دا په داسې حال کې ده، چې یوازې د یکشنبې په ورځ د اعتراض کوونکو او پولیسو تر منځ په نښتو کې لږ تر لږه ۹۵ کسان ووژل شول.
ځايي پولیس وايي، د سوېلي وزیرستان په مرکز واڼه کې ناڅرګندو وسله والو د يوه ښوونځي دوه ښوونکي په ډزو وژلي او وسله وال له سیمې تښتېدلي دي. پولیس وايي، د وسله والو د پلټنې عملیات یې پیل کړي او د سیمې له خلکو یې هم د هغوی په موندلو کې مرسته غوښتې.
سرچینو له سوېلي وزیرستانه افغانستان انټرنشنل پښتو ته ويلي، چې دغه د ښوونځي دوه ښوونکي نن دوشنبه (زمري ۱۵مه) له غرمې مخکې د سوېلي وزیرستان مرکز واڼه په لنډي ډوک سیمه کې مخ پټو وسله والو په ډزو ووژل او هغوی له سیمې وتښتېدل.
په سیمه کې خپلواک خبریال لال وزیر وايي، دا څووم ځل دی چې په وزیرستان کې د ښوونځي ښوونکي په نښه او وژل کیږي خو د ده په خبره امنیتي ځواکونه په سیمه کې د امن په راوستو کې پاتې راغلي.
تر اوسه پورې کومې وسله والې ډلې د دغې پېښې په اړه څه نه دي ويلي.
د محمود او محمد انور په نومونو د دغو دوو ښوونکو د کورنیو غړي وايي، چې دغه ښوونکي له ښوونځي څخه د کور په لور روان وو چې د وسله والو له خوا په نښه شول.
په دې وروستیو کې په لوی وزیرستان کې د ولسي خلکو، خبریالانو او ښوونکو هدفي وژنې او په بمونو د ښوونځیو الوځولو پېښې تر پخوا یو مخ زیاتې شوې دي او د سیمې خلک شکایت کوي چې حکومت په دغو سیمو د امن په راوستو کې پاتې راغلی.
د بښنې نړېوال سازمان وايي، په بنګله دېش کې لا هم لاریونونه روان دي او تېره ورځ د ۱۴ پولیسو په ګډون شاوخوا ۱۰۰ تنه وژل شوي. دغه سازمان د بنګله دېش له حکومته غوښتي چې په لاریونونو کې د تاوتریخوالي کمولو لپاره وړ چاپېریال رامنځته کړي.
د رسنیو د راپورنو له مخې، په بنګله دېش کې د حکومت په ضد پر لاریونونو تاوتریخوالی په شدت سره مخ په زیاتېدو دی.
د شمېرو له مخې د یکشنبې په ورځ د لومړۍ وزیرې شیخ حسینه د مخالفانو، امنیتي ځواکونو او د واکمن ګوند د پلویانو ترمنځ تاوتریخوالي کې لږ تر لږه ۹۴ تنه وژل شوي.
راپورنه وايي، چې د تېرې یوې میاشتې راهیسې د حکومت ضد پیل شویو لاریونو پر مهال د تېرې یکشنبې د ورځې د مړو شمېر ټکان ورکوونکی و.
لاریون کوونکي د لرګیو او چاقوانو پر مټ وارونه کوي، تېره ورځ دغو قهرجنو لاریون کوونکو د عنایت پور په سیمه کې پر یوه پوسته برید کړی او ۱۱ پولیس یې وژلي دي.
د بګله دېش پولیسو رسنیو ته ویلي، چې د دغه هېواد مرکز ډهاکې ښار د «جګړې په ډکر» بدل شوی او زرګونو لاریون کوونکو په ډهاکه کې یوه روغتون ته څېرمه موټرو او موټرسایکلو ته اور اچولی دی.
پولیسو ویلي، چې لاریونو کوونکو له ګرځبندیز څخه سرغړونه کړې، او د شپې په تیاره کې د ډزو او چاودونه غږونه هم اوریدل شوي.
د راپورونو له مخې له دغو ډزو وروسته د ډهاکې روغتون ته د ۱۲ کسانو مړي وروړل شوي چې ټول په ډزو لګیدلي وو.
دغه لاریون د بنګله دېشي زدهکړیالانو له لوري له هغه وروسته پیل شو، چې هلته واکمن حکومت د دولتي کسانو خپلوانو ته د امتیازونو د ورکړې پرېکړه وکړه.
دغه لاریونونه د شیخ حسیني د پنځلس کلن حکومت پرمهال تر ټولو خونړي بلل شوي.
حکومت د لاریونونو د غلي کولو لپاره انټرنیټې خدمتونه، ښوونځي او پوهنتونه بند کړي او ګرځبندیز یې اعلان کړی دی.
بل خوا د بښنې نړېوال سازمان په بنګله دېش کې د روانو تاوتریخجنو لاریونونو پر مهال د مرګ ژوبلې په اړه اندېښنه ښودلې او له قانون پلي کوونکو ادارو څخه غوښتنه کوي چې له زغم څخه کار واخلي چې د نورو جدي زیانونو او وژلو څخه مخنیوی وشي.
دغه سازمان ویلي، چې حکومت کولی شي یوازې د اړتیا وړ ځواک وکاروي چې یوازې حالت مهار کړي.
د شمالي کوریا دولتي خبري اژانس د دوشنبې په ورځ راپور ورکړ چې د شمالي کوریا مشر کیم جونګ اون خپلو سرحدي ځواکونو ته د لنډ واټن ویشتونکو ۲۵۰ بالستیک توغنديو سیسټمونه په واک کې ورکړي چې د سوېلي کوریا سره یې پر پوله کې ځای په ځای کړي.
هغه د دغو توغندیو د سیسټمونو د سپارلو په مراسمو کې وویل چې د امریکا له خوا د اټمي پوځي بلاک جوړېدل پیونګ یانګ دې ته اړ کړی چې خپلې پوځي وړتیاوې نورې هم پیاوړې کړي.
د شمالي کوریا مشر دا هم ویلي چې هېواد به یې په نږدې راتلونکي کې د اټومي ګواښونو د مخنیوي او د ځان ساتنې لپاره خپل اټومي چمتووالی زیات کړي.
سوېلي کوریا د کیم جونګ اون دغه ګام د پلازمېنې سیول لپاره یو ګواښ بللی دی.
شمالي کوریا تېره میاشت ویلي و، چې په بریالیتوب سره یې یو نوی تکتیکي بالستیک توغندی ازمویلی دی.
د خيبرپښتونخوا اعلی وزير علي امين ګنډاپور پاکستاني رسنیو ته ويلي، چې په اسلام اباد کې غونډه جوړوي، او هیڅوک یې مخه نه شي نیولی. هغه په صوابۍ کې له رسنیو سره خبرو کې ويلي، چې له غونډې وروسته به معلومه شي چې«شيدې شيدې او اوبه اوبه» دي.
نوموړي ټینګار وکړ چې د صوابۍ په غونډه کې به د اسلام اباد د غونډې ترسره کېدو ورځ وټاکي.
علي امین ګنډاپور وايي چې محکمې او قاضیانو ورته ویلي، چې پر دوی له پاسه فشار دی.
د خیبرپښتونخوا اعلی وزیر په څرګنده دا نه دي ويلي، چې دغه غونډه به د څه لپاره جوړوي خو هغه تل په خپلو خبرو کې نیوکې کوي چې د پاکستان تحریک انصاف ګوند مشر عمران خان دی له بنده خوشې شي.
علي امین ګنډاپور په خیبرپښتونخوا لپاره د عمران خان ګوند تر نورو مخکښ کس دی چې په تېرو ټاکنو کې یې د خیبرپښتونخوا د اعلی وزیر څوکۍ وګټله.
شنوونکي وايي، علي امین ګنډاپور دا ځل غواړي چې په اسلام اباد کې وفاقي حکومت ته مخامخ وايي، چې د پاکستان تحریک انصاف ګوند مشر عمران خان د محکمې له لوري نور مجرم نه پیژندل کیږي او باید ژر خوشې شي.
ګنډاپور د پي ټي ای په مشرانو کې تر نورو احساساتي او ژر پرېکړه کوونکی مشر ګڼل کیږي.
هغه لس ورځې وړاندې د خیبرپښتونخوا په بنو کې د امن جلسې ته په وینا کې ویلي و، چې د دغې صوبې په هیڅ یوې برخه کې به د پوځي عملیاتو اجازه ورنه کړي؛ خو هغه له پولیسو غوښتي چې په ټوله صوبه کې دې د وسلهوالو ډلو پلټنه پیل وکړي.
خو بل پلو د پاکستان وفاقي حکومت ګنډاپور تورن کړ، چې هغه د خلکو د تېر اېستلو هڅه کوي او د امن جوړه شوې جرګه یې په سیاسي جلسه بدله کړه.
د پاکستان د طبیعي پېښو پر وړاندې د مبارزې ادارې د یکشنبې په ورځ ویلي، چې په ټول هېواد کې د سختو بارانونو او سېلابونو له امله لږ تر لږه ۲۲ تنه مړه شوي او لسګونه نور ټپیان شوي.
جیو نیوز خبرې شبکې د یکشنبې په ورځ د زمري په ۱۴ مه نېټه د پاکستان د طبیعي پېښو پر وړاندې د مبارزې ادارې په حواله راپور ورکړ، چې دغه کسان د سختو بارانونو له امله په بېلابېلو پېښو کې لکه د ځمکې ښویېدو، د کورونو د چتونو راپرېوتو، سېلابونو او تالندې له امله مړه شوي دي.
پاکستان کې د طبيعي پېښو پر وړاندې د مبارزې ادارې ویلي، چې په دغو پېښو کې ۳۲ تنه ټپيان شوي، ۲۶۳ کورونه او سلګونه جريبه کرنيزه ځمکه، لسګونه پلونه او لسګونه کيلومتره سړکونه هم ويجاړ شوي دي.
په وروستیو ورځو کې د هند او پاکستان په ګډون په یو شمیر اسیايي هېوادونو کې سخت موسمي بارانونه وریږي.
د جمعې په ورځ، د زمري په ۱۲مه، د پاکستان حکومت ويلي و، چې په لاهور ښار کې ۳۶۰ ملي متره باران شوی، چې په تېرو ۴۴ کلونو کې بې ساری و.