د طالبانو د کورنیو چارو وزارت په يوې اعلاميه کې د نشه يي توکو د کښت او پلور د زياتېدو اړوند د (سيګار) وروستی راپور بې بنسټه بللی. طالبانو په اعلاميه کې ويلي، چې په افغانستان کې د نشه يي توکو د کرکيلې په اړه د ځينو بهرنيو بنسټونو او هېوادونو اندېښنې بې ځايه دي.
د طالبانو تر کنټرول لاندي ملي ټلویزيون د چهار شنبې په ورځ (د زمري ۱۷مه) پر خپله اېکس پاڼه د افغانستان بیارغونې لپاره د امريکا د سر مفتش دفتر (سيګار) د راپور په غبرګون کې د دغه ډلې د کورنيو چارو وزارت د اعلاميې ځيني برخې نشر کړي.
په اعلاميه کې طالبانو ويلي، چې واک ته د دوی په رسېدو په لومړي ځل د نشه يي توکو کښت، پلور او قاچاق له منځه تللی.
دوی ليکلي دي: « د سیګار وروستی راپور بې بنسټه دی، له څو لسیزو وروسته د لومړي ځل لپاره په ټول هېواد کې د نشه یي توکو پدیده له منځه تللې.»
ملي ټلویزيون د همدې اعلاميې له مخې ليکي، چې طالبانو د نشه يي توکو د کرکيلې په اړه د یو شمېر بنسټونو او هېوادونو اندېښنې بې ځايه بللی او ټينګار يې کړی، چې دوی به هېڅ چاته د دې کښتونو د کر اجازه ورنه کړي.
طالبان وايي: «اسلامي امارت به هيڅکله اجازه ورنه کړي، چې د تېرو کلونو په څیر افغانستان يو ځل بيا د نشه یي توکو د سوداګرۍ او قاچاق په مرکز بدل شي.»
طالبانو په دې اعلاميه کې خلکو ته خبرداری ورکړی، چې دوی د نشه يي توکو د کښت، قاچاق، توليد او پلور د مخنيو لپاره مبارزه کوي او په دې برخه کې د هېڅ چا پروا نه ساتي.
پر طالبانو نیوکې دا دي، چې دغه ډله په ځینو سېمو کې د کوکنار کښت اړولو او مخنيوي په برخه کې توپیري چلند کوي.
وړاندې داسې راپورنه نشر شول، چې په جنوبي ولایتونو کې د طالبانو سيمه یيزو قومندانانو په کورونو کې کوکنار کرلي دي، چې ځايي طالب چارواکي یې په تخریبولو کې ناکام دي.
