د طالبانو تر کنټرول لاندې د افغانستان مرکزي بانک په هرات، خوست، هلمند، غزني او کندهار ولایتونو کې د هغو صرافيو فعاليت بند کړی، چې جوازونه یې نه درلوده. د دغه بانک ویاند اعلان وکړ، چې د صرافيو خدمات باید د رسمي شرکتونو له لارې ترسره شي.
د مرکزي بانک ویاند حسیب الله نوري ویلي؛ هغه صرافۍ چې د فعالیت جواز یې نه درلود او یا تمدید نه و فعاليت یې ځنډول شوی دی.
طالبانو ویلي، چې د پیسو تبادله کوونکي باید جواز ولري که نه نو په بازار کې د فعالیت اجازه نه لري.
تر دې مخکې طالبانو په هرات کې د صرافيو بازار بند کړی او (د چنګاښ ۱۸مه) نېته يې د کابل په سرای شهزاده کې هم د ځينو صرافيو پر فعاليت بنديز لګولی و.
هغه وخت کې د طالبانو تر واک لاندې د مرکزي بانک چارواکو ویلي وو، چې د پیسو تبادله کوونکو ته باید رسمي جوازونه ورکړل شي.
خو طالبانو د صرافۍ د نوي جواز لپاره د درانه مالي تضمین د اېښودو شرط ایښی، چې یو شمېر صرافان یې د ورکړې توان نه لري.
