ملګري ملتونه: د سېلاب ځپلو کسانو شمېر د غبرګولي میاشتې څخه ۳۰۰ تنو ته رسېدلی دی
د ملګرو ملتونو پراختیايي اداره وايي، چې د غبرګولي له میاشتې راهیسې په افغانستان کې ناڅاپي سېلابونو ۳۰۰ کسان وژلي او ۹ زره کورونه یې ویجاړ کړي دي.
د ملګرو ملتونو پراختیايي اداره وايي، چې د غبرګولي له میاشتې راهیسې په افغانستان کې ناڅاپي سېلابونو ۳۰۰ کسان وژلي او ۹ زره کورونه یې ویجاړ کړي دي.
د ملګرو ملتونو دغه اداره وايي، په پام کې لري چې د دغو سیلاب ځپلو لپاره لنډمهاله سرپناه جوړه کړي.
دغې ادارې پر اېکس پاڼې لیکلي، چې د نورو بشردوستانه سازمانونو سره کار کوي ترڅو لومړني د اړتیا وړ شیان لکه اوبه، لنډمهاله سرپناه لکه خواړه او روغتیايي پاملرنې سیلاب ځپلو ته ورسوي.
د کار په بدل کې د نغدي مرستو د ویش پروګرام، د کرنیزو ځمکو، کانالونو او د اوبو سرچینو په پاکولو تمرکز، د دې موسسې یو له لنډمهاله پروګرامونو څخه دی چې له سیلاب ځپلو سره مرسته کوي.
دغه بنسټ وايي، د سړکونو رغول، د سېلاب ځپلو کورونو رغول او د روغتيايي خدمتونو وړاندې کول له سېلاب ځپلو سره د مرستې لپاره د اوږدمهاله پلانونو له ډلې دي.
د ملګرو ملتونو پراختیایي اداره وايي چې د خوراکي توکو د نه خوندیتوب سره د مبارزې لپاره یې په اغیزمنو سیمو کې د خوراکي توکو د ویش پخلنځي هم جوړ کړي دي.
دغه سازمان وايي، د خطر د نقشو پر بنسټ به د اغېزمنو کورنیو د اوسېدو لپاره موقتي او دایمي سرپناوې جوړوي.
دغه اداره وايي، د حفاظتي زیربناوې لکه محافظوي دیوالونه او د اوبو کانالونه د هغو اقداماتو له جملې څخه دي چې ملګري ملتونه یې په اغیزمنو سیمو کې د ناورین د مقاومت او مدیریت د زیاتوالي په موخه جوړوي.
