د ايران پارلمان د کمیسیون مشر وايي، دغه کمیسیون د یوې مصوبې له لارې ايران ته د بهرنيو وګړو له ننوتلو وروسته پر هغوی ضمانت حتمي کوي. محمد صالح جوکار وويل، چې د دغه فرمان له مخې به له هغو بهرنيانو څخه چې په ايران کې د پاتې کېدو اراده لري، د ضمانت په ډول پيسې اخيستل کېږي.
هغه څرګنده کړه: «دغه ضمانت به په ایران کې د پاتې کیدو له پای ته رسیدو وروسته د بهرنیو وګړود پر وخت وتلو تضمین کوي چې اندازه به یې د کورنیو چارو وزارت لخوا ټاکل کیږي.»
د هغه په وينا، دغه ضمانت به له ايران څخه د وتلو پر مهال بېرته هغه کس ته ورکړل کیږي.
ایرنا خبری اژانس د شنبې په ورځ د محمد صالح جوکار په حواله راپور ورکړ چې د ایران د پارلمان د کمیسیون په غونډه کې د بهرنیو وګړو د تنظیمولو په موضوع خبرې وشوې.
افغانان په ایران کې د کډوالو تر ټولو زیات شمېر جوړوي.
محمد صالح جوکار زياته کړه: «د مجلس د کمیسیون د پريکړه ليک له مخې د بهرنيو وګړو د معلوماتو د ثبتولو تصميم ونيول شو.»
هغه همداشان وویل چې د ایران د کورنیو چارو په وزارت کې به د رهبرۍ شورا تر عنوان لاندې یوه شورا جوړه کړي، چې د بهرنیو وګړو په موضوع پورې اړوند د ۲۱ ادارو استازي به په کې غړیتوب ولري.
د هغه په وينا، دغه شورا به د بهرنيو وګړوپه چارو کې د پاليسۍ جوړولو مسووله وي.
د ایران د کورنیو چارو وزارت وايي، په ایران کې شاوخوا پنځه میلیونه افغان کډوال مېشت دي.
د مسعود پزشکیان د حکومت په راتلو سره په ایران کې د افغان کډوالو لپاره شرایط لاپسې سخت شول.
