د افغانستان کرېکټ بورډ په هند کې د ګریټر نوېډا لوبغالي څخه د افغان لوبغاړو د تمرینونو ویډیوګانې او انځورونه خپاره کړي او ښکاري چې د سبا ورځې لپاره چمتوالی نیسي. د افغانستان کرېکټ ملي لوبډلې او نیوزیلنډ لوبډلې تر منځ یواځینۍ ټېسټ لوبې ته ایله یوه ورځ پاتې ده.
د دغو دواړو لوبډلو تر منځ لوبه سبا د افغانستان پر وخت د سهار نهه بجې پیلیږي.
افغان کرېکټ بورډ د خواله رسنیو له لارې پر خپلو رسمي پاڼو د ټېسټ سبانۍ لوبې د چمتوالي او تمرینونو انځورونه او ویډیوګانې خپرې کړې.
په خپرو شویو ویډیوګانو کې لیدل کیږي، چې د افغان ملي لوبډلې مشر روزونکی جانټن ټراټ افغان لوبغاړو ته د توپوهنې او توپ اچونې په اړه لارښوونې کوي.
افغان لوبغاړي وايي، د دوشنبې ورځې لوبې ته یې چتموالی ښه روان دی.
افغان لوبډلې تېره شپه د نیوزیلنډ لوبډلې ته د ماښام ډوډۍ هم چمتو کړې وه.
دغه لوبې د افغانستان په کوربه توب د هند ګریټر نوېډا لوبغالي کې ترسره کیږي.
افغانستان د ۲۰۱۷ کال د جون په ۲۲مه نېټه د ټېسټ لوبو غړیتوب ترلاسه کړ.
د افغانستان کرېکټ لوبډلې تر اوسه پورې نهه ټېسټ لوبې کړې، چې درې یې ګټلې او شپږ یې بایللې دي.
افغانستان په ټېسټ سیالیو کې د نیوزیلنډ پرتله ډېره کمه تجربه لري.
افغانستان تردې مهاله دوه لوبې له بنګله دېش، دوه له زیمبابوې، دوه له اېرلینډ، یوه یوه له وېسټ اېنډیز، سریلانکا او هند سره کړې دي.