د ملګرو ملتونو د خوړو نړۍوال پروګرام وايي، چې اروپايي ټولنې له افغانستان سره ۲۵ مېلیونه یورو مرسته کړې ده. دغه سازمان ویلي، چې دغه بشري مرستې به د ماشومانو، میندوارو او شیدې ورکوونکو مېرمنو په ګډون د سلګونو زرو خلکو د خوړو د خوندیتوب په موخه ولګول شي.
په کابل کې د خوړو نړۍوال پروګرام د سې شنبې په ورځ د (وږي ۲۰مه) خبر ورکړی، چې د اروپايي ټولنې له بودجې سره به ۶۰۰ زره کسانو سره نغدي او خوراکي، ۲۵۰ زره مېندواره او شېدې ورکوونکو ښځو او ۱۴۰ زره ماشومانو ته خوراکي مرستې ورسوي.
په افغانستان کې د اروپايي ټولنې د بشري مرستو عملیاتي مشر فرانسوا ګومانز وویل:«اروپایي ټولنه د افغانستان له خلکو سره چې په نړۍ کې یو له ستر او پېچلي بشري ناورین سره مخامخ دي، د ملاتړ په برخه کې په خپلو ژمنو ولاړه ده.»
د خوړو نړۍوال پروګرام وايي، په تېرو درېیو کلونو کې اروپايي ټولنې له افغانستان سره د خوړو د نړۍوال پروګرام له لارې ۱۵۰ مېلیونه یورو مرسته کړې .
اروپايي ټولنې د روان هجري لمریز کال په غويي میاشت کې د زدهکوونکو د خوراکي خوندیتوب لپاره ۱۰ مېلیونه یورو مرسته کړې وه.
