د مالیزیا د پولیسو څارنوال وايي، تر ۴۰۰ ډېر هغه ماشومان یې ژغورلي چې یوه خیریه اداره پورې تړلو اسلامي مرکزونو کې له جنسي ځورونې سره مخ وو. رزارالدین حسین وايي، د دغه هېواد دوو ولایتونو کې یې د دې ادارې پر شلو مرکزونو چاپه اچولې او د استادانو په ګډون یې ۱۷۱ کسان نیولي دی.
ښاغلي حسین پرون خبریالانو ته وویل، وروسته له هغه یې د دې مرکزونو پرضد ګام پورته کړ چې روانه میاشت ورته د دې ماشومانو د جنسي ځورونې، ناوړه کارونې، نه پاملرنې او کړولو راپور ور کړل شو.
په ژغورل شویو ماشومانو کې ۲۰۱ هلکان او ۲۰۱ نجونې دي چې عمرونه یې له یو تر ۱۷ کلونو رسېږي.
لومړنۍ موندنې ښيي چې پر دې ماشومانو اول د دوی پالونکو جنسي تېری کړی او بیا یې هغوی ته دا ور زده کړي چې د دې استوګنځیو پر نورو ماشومانو تېری وکړي.
پولیس وايي ځینې هغه ماشومان ملا او لوسونو ته پر ګرمو څمڅو یا کاشوغو سوځول شوي چې د دوی له غوښتنو یې ډډه کړې ده.
دا ماشومان په داسې ودانیو کې ساتل کېدل چې د الارقم په نوم له یوې منع شوې مذهبي فرقې سره تړلې خیره اداره یې چلوي.
د جي ای اېس بي یا اخوان نړیوال خدمتونه او سوداګرۍ په نوم ادارې د دې مرکزونو له خیریه ادارې د چلولو تورونه رد کړي خو په دا مهال زیاتوي چې له الارقم سره تړلې ده.
اخوان نړیوال خدمتونه او سوداګري مالیزیايي اداره ده چې د انډونیزیا، اسټرالیا، تایلنډ، سنګاپور، سعودي، فرانسې او مصر په ګډون مختلفو هېوادونو کې پلورنځي لري.
رویټرز خبري اژانس وايي، دا اداره د الارقم اسلامي ډلې ده، چې فغالیت یې پر ۱۹۹۴ کال په مالیزیا کې منع شوی دی.
د مالیزیا پولیس وايي، دغه ژغورل شوي ماشومان هم د هغو مالیزیايي کارمنانو بچیان دي چې له زېږون وروسته دې د دې مرکز خونو ته سپارل شوي دی.
