په کابل کې د قزاقستان سفیر د طالبانو د بهرنیو چارو له وزیر سره په کتنه کې په قزاقستان کې د ممنوعه ډلو له لېسته د «طالبانو» لرې کېدل او په استانه کې د طالبانو د شارژدافیر منل دوه مهم سیاسي پرمختګونه وبلل.
علیم خان یسین ګیلدییف له امیر خان متقي سره په کتنه کې همداراز زیاته کړې، چې افغانستان د قزاقستان لپاره یو مهم اقتصادي هدف دی او د هغه هېواد غنمو لپاره یو ښه بازار او ټرانزیټي لار ګڼل کېږي.
دواړو لورو د پنجشنبې په ورځ (د وږي ۲۲مه) سره وکتل او د دواړو هېوادونو ترمنځ یې د اړیکو پر لا ښه کېدو ټینګار وکړ.
ښاغلی ګیلدییف وایي، چې قزاقستان او افغانستان دواړه لویو بازارونو ته د توکو د لېږد لپاره یو بل ته ټرانزیټي لارې ورکولای شي.
د نوموړي په خبره؛ د افغانستان موقعیت د سیمې او په ځانګړې توګه د قزاقستان لپاره ارزښتناک دی.
له دې سره، د طالبانو د بهرنیو چارو وزیر بیا د افغانستان او قزاقستان اړیکې نږدې وبللې او د دواړو هېوادونو ترمنځ یې د سوداګرۍ پر لا پراختیا ټینګار وکړ.
د یادولو ده، چې د قزاقستان د بهرنيو چارو وزارت د روان کال په زمري میاشت کې د طالبانو د شارژدافير محمد الرحمان رحماني د باور لیک د منلو خبر ورکړ.
سره له دې، چې تر اوسه د سیمې ډېرو هېوادونو د سفیرانو په کچه د طالبانو سیاسي استازي نه دي منلي؛ خو اکثره هېوادونو بیا په کاري کچه د دغې ډلې ډیپلوماټیک استازي منلي دي.
اوسمهال چې پر افغانستان د طالبانو له واکمنۍ څخه درې کاله تېرېږي؛ خو د قرغزستان او قزاقستان په ګډون د منځنۍ اسیا یو شمېر هېوادونه له دغې ډلې سره ښې ډېپلوماتیکې او اقتصادي اړیکې لري.
