د جمهوري غوښتونکو مېرمنو شبکې له ملګرو ملتونو او د بشري حقونو د ملاتړو بنسټونو څخه غوښتي، چې په دایکنډي ولایت کې دې وروستۍ پېښه وڅېړي او پایله دې هم له ټولو سره شریکه کړي.
دغې شبکې د یوې خبرپاڼې په خپرولو سره په دایکنډي ولایت کې د ۱۴ تنو وژنه غندلې ده.
په خبرپاڼې کې راغلي:« له بده مرغه دا لومړی ځل نه دی، چې زموږ هزاره هېوادوال په نښه کېږي او په بې رحمۍ سره وژل کېږي.»
دغې شبکې ویلي، د طالبانو تر بېرغ لاندې دغې پېښې یو ځل بیا دا په ډاګه کړه چې طالبان د قومونو ترمنځ د یووالي او ورورولۍ دښمنان دي.
خبرپاڼې وړاندې کاږلي، چې طالبان تل په ټول افغانستان کې د بشپړ امنیت د ټینګښت خبرې کوي؛ خو دغه ډول وژنې چې د دوی په واکمنۍ کې ترسره کېږي، ولې یې د لاس لرلو په تور څوک نه نیول کېږي؟
خبرپاڼه زیاتوي:« له همدې امله ناشونې ده، چې په دغه ډول وژنو کې د طالبانو لاس لرل بابیزه وګڼو.»
دوی د خبرپاڼې په وروستۍ برخه کې له زبرځواکونو هم غوښتنه کړې، چې د طالبانو له ترهګرې ډلې سره دې له هر ډول تعامله ډډه وکړي او د خلکو ترڅنګ دې ودرېږي.
تېره ورځ سیمهییزو سرچینو افغانستان انټرنشنل ته ویلي و، چې نامعلومو کسانو په دایکنډي کې لږ تر لږه ۱۴ هزاره ټبره ولسي خلک وژلي دي.
د سرچينو د معلوماتو له مخې، په دې پېښه کې څلور نور کسان ټپيان شوي هم دي.
ورته مهال داعش - خراسان وسلهوالې ډلې د پنجشنبې په ورځ په یوه بیان کې د دایکنډي او غور ولایتونو تر منځ پر لاره د لږ تر لږه ۱۴ هزاره ټبرو د وژلو پړه منلې وه.
