ملګرو ملتونو د لبنان له یو میلیون کسانو سره د بېړنیو مرستو عملیات پیل کړل

د خوړو نړۍوال سازمان د لبنان له یو میلیون زیانمنو کسانو سره د بېړنیو مرستو د عملیاتو د پیل خبر ورکړ. دغه سازمان اوسمهال پر هغو بې ځایه شویو د خوړو بستې وېشي، چې په پنډغالي کې دي.

یاد سازمان همداراز زیاتوي، چې تر اوسه یې لږ تر لږه له ۶۶ زره کسانو سره مرستې کړي دي.
د ملګرو ملتونو د خوړو نړۍوال سازمان وایي، چې د خپلو حیاتي عملیاتو لپاره د روان کال تر پایه ۱،۵ میلیون ډالرو ته اړتیا لري.
دغه سازمان له نړۍوالې ټولنې غواړي، چې اړمنو کسانو ته د مرستې لپاره د همکارۍ او ملاتړ زمینه برابره کړي.

دا په داسې حال کې ده، چې د لبنان لومړي وزیر نجیب میقاتي بیا ویلي دي، چې د اسراییل د هوایي عملیاتو په پایله کې به یو میلیونه کسان بې ځایه شي.
الجزیرې د میقاتي له قوله لیکلي، چې دا به په لبنان کې د بې ځایه کېدو تر ټولو لوړه کچه وي.
نوموړي دغه راز د ترینګلتیاوو د کمېدو لپاره ویلي، چې له ډیپلوماتیکو حل لارو پرته بله لار نه شته.
له دې سره، نن د کاناډا د بهرنیو چارو وزارت هم اعلان وکړ، چې د لبنان ملکي کسانو ته د مرستې په موخه ۷،۴ میلیون ډالره ځانګړې کوي.
د کاناډا د بهرنیو چارو وزارت دغه راز د لبنان او اسراییل تر منځ پوله کې د ۲۱ ورځيني اوربند غوښتنه هم کړې ده.
فرانسې او جرمني بیا په لبنان کې د بریدونو په پای ته رسېدو ټینګار کړی.
د اسراييل پوځ د شنبې په ورځ اعلان وکړ، چې د حزب الله ډلې مشر سید حسن نصرالله یې د بېروت په سویلي څنډه کې په يوه هوایي بريد کې وژلی دی او د رویټرز د راپور له مخې؛ بیا ښاغلی نصرالله نن د پېښې له ځایه د خاورو له لاندې را اېستل شوی دی.
د اسراییل پوځ زیاته کړې، چې دغې ډلې مرکزي غونډه درلوده چې مشر او نور غړي یې په نښه شول.
د یادولو ده، چې حسن نصرالله له درېیو لسیزو راهیسې د حزب الله ډلې مشري کوله.
اخوا د اسراییل پوځ حوثي اورپکو ته هم خبرداری ورکړی، چې ډېر به د دوی وار هم ورسېږي.