د ډنمارک پولیس د اسراییل سفارت ته نږدې د چاودنو پلټنه کوي
ډنمارکي رسنۍ وايي، دغه دوه چاودنې نن سهار په پلازمېنه کوپنهاګن کې د اسراییل سفارت ته نږدې شوې، خو مرګ ژوبله یې نه ده اړولې.
د کوپنهاګن پولیسو پر خپله ایکسپاڼه لیکلي « چا ته زیان نه دی اوښتی او موږ په سیمه کې په لومړنیو پلټنو بوخت یو».
اسراییل ټایمز د اسراییل د بهرنیو چارو وزارت له خولې وايي، چې د چاودنو پرمهال سفارت بند و او ټول کارکوونکي او ودانۍ یې خوندي دي.
دغه چاودنې داسې مهال کیږي، چې تېره ورځ ایران پر اسراییل شاوخوا ۴۰۰ توغندي وتوغول، چې ویل کیږي یو شمېر یې د اسراییل پر ځمکه پرېوتي او ځینې په هوا کې له منځه وړل شوي دي.
