د افغانستان له خبریالانو د ملاتړ سازمان په میدان وردګ او تخار ولایتونو کې د طالبانو له خوا په رسنیو کې د انځور او ویډیوګانو په خپرولو بندیزونه غندي او وایي، چې د دغې ډلې له خوا د خبریالانو وېرول او د رسنیزو فعالیتونو محدودول د باور ناورین رامنځته کوي.
دغه سازمان د یوې اعلامیې په خپرولو سره زیاته کړې ده، چې د رسنیو پروړاندې د طالبانو سخت دریځۍ به د دې ډلې حاکمان لا زیات منزوي کړي.
د اعلامیې له مخې، په رسنیو کې د انځور او ویډیوګانو په خپرولو بندیزونه د بیان له ازادۍ څخه ښکاره سرغړونه او معلوماتو ته د لاسرسي محدودول دي.
د افغانستان له خبریالانو د ملاتړ سازمان وایي، چې پر رسنیو د محدودیتونو وضع کول نه یوازې د خبریالانو پر مسلکي کار منفي اغېز کوي، بلکې له ټولنې او وګړو د حقایقو د پټولو لامل هم ګرځي.
یاد سازمان له نړیوالې ټولنې، د بشري حقونو له سازمانونو او د خبریالانو له ملاتړو ادارو غوښتي، چې د افغانستان د خبریالانو ملاتړ په جدي توګه وکړي او د دې ډول محدودیتونو پر وړاندې د ډیپلوماسۍ او نړۍوالو فشارونو له لارې غبرګون وښيي.
د دوی په وینا، خبریالان باید د ځپونکو سیاستونو هدف ونه ګرځي او له امنیتي ګواښونو او سختو محدودیتونو پرته د اطلاع رسونې کار په ازادۍ سره ترسره کړي.
دا په داسې حال کې ده، چې طالب چارواکو په تخار ولایت کې د سیمه ییزو رسنیو له مسوولانو سره په کتنه کې خبریالان د ویډیویي راپورونو او انځور اخیستو څخه منع کړي دي.
دوی ټینګار کړی، چې تصویري رسنۍ دې په راډیوګانو بدلې شي.
بل خوا، دغې ډلې په دې وروستیو کې په کندهار ولایت کې هم د ملا هبت الله په امر د ملي ټلویزیون پر خپرونو بندیز لګولی او د بندیز لامل هم په دې رسنۍ کې د ژوندیو انځورونو خپرول بلل شوی دی.
له دې سره، نن د افغانستان د خبریالانو مرکز بیا د یو راپور په خپرولو سره وویل، چې طالبانو په غزني ولایت کې د خوشحال راډیو مدیر مسوول حکمت ارین په یو میاشت بند محکوم کړی دی.
یاد مرکز ویلي، چې طالبانو ښاغلی ارین د طالبانو د جنګي عملیاتو په اړه د کتاب لیکلو په تور په بند محکوم کړی دی.
د یادولو ده، چې طالبانو په تېرو درېیو کلونو کې د دغو بندیزونو ترڅنګ لسګونه خبریالان نیولي، بندیان کړي، وهلي، ګواښلي او په بندخونو کې یې سخت شکنجه کړي هم دي.
سره له دې چې له رسنیو او خبریالانو سره د طالبانو دغه چلند د خبریالانو د ملاتړو ادارو له سخت غبرګون سره مخ شوی؛ خو یادې ډلې نه یوازې دا چې خپل دریځ د رسنیو او خبریالانو پر وړاندې بدل کړی نه دی، په دې وروستیو کې یې خپلې سخت دریځ لا پسې ډیر کړی دی.
