د افغانستان د ځواکمنو مېرمنو او د «ازادهګان» په نامه غورځنګونه وایي، د طالبانو ډلې سره هر ډول تعامل او د دغه «ظالم رژیم» پیاوړي کول چې په هره پلمه وي له بشریت ضد جنایت څخه د ملاتړ په مانا دی.
دغه غورځنګونه وایي:« د طالبانو د امر بالمعروف د وزیر وروستیو څرګندونو سره موږ په دې باوري شو، چې هر ډول محدودیت، خپلسرې نیونه د بشري حقونو او بنسټیزو حقونو څخه ښکاره سرغړونه ده.»
دغو دوو غورځنګونو تېره ورځ په اسلام اباد کې د یوې خبري ناستې پرمهال په دې تړاو یو پرېکړه لیک هم صادر کړ.
په دغه پرېکړه لیک کې راغلي، چې دوی د افغانستان د بشري حقونو او د ښځو د حقونو د مدافعینو په توګه له افغانانو غوښتي، چې د دغې ډلې پر وړاندې یو شي او ملي قیام وکړي.
دغو غورځنګونو له نړۍ غوښتنه کړې، چې نړۍوال منل شوي نورمونه دې د سیاسي لوبو لپاره نه قرباني کوي.
په خبرپاڼه کې دا رنګه راغلي، چې د نړۍ د هغو هېوادونو ملتونه او اتباع چې حکومتونه یې له طالبانو سره ملګري دي او یا له طالبانو سره د اړیکو په لټه کې دي باید پوه شي چې حکومتونه یې طالبانو ته پیسې ورکوي؛ چې په دې توګه د طالبانو په څېر ترهګرې او د تمدن ضد ډلې پیاوړې کېږي.
دغه غورځنګونه وایي:« موږ د نړۍ له بېدارو ولسونو غواړو، چې له خپلو واکمنانو او پالیسي جوړونکو څخه پوښتنه وکړي چې د مرستو ډېرې پیسې د یوې داسې ډلې د پیاوړتیا لپاره کارول کېږي چې د دوی له ارزښتونو، په ځانګړې توګه د بشري حقونو او ښځو له حقونو سره په ټکر کې دي.»
دوی وایي، په تېرو درېیو کالو کې نړۍوالو سازمانونو او د بشري حقونو ملاتړ کوونکو په افغانستان کې د هر ډول جنایت پر وړاندې یوازې د خبرپاڼو په خپرولو بسنه کړې ده.
دوی زیاتوي:« له نړۍوالو معتبرو بنسټونو زموږ تمه دا وه، چې د خپلو مسوولیتونو په درک کولو سره، د خبرپاڼو په خپرولو زیانمن نه کړي او له دغه دروند بار ته دې په سمه توګه اوږه ورکړي.»
دوی دا رنګه له نړۍوالو محکمو غوښتي، چې طالب مشران دې د جنګي جنایت کوونکو، د بشري حقونو او ښځو د حقونو نقضوونکو او د جنسیتي توپیر د مجرمینو په توګه پوښتنو ګروېږنو ته راکاږي.
