نیویارک ټایمز امریکايي ورځپاڼې د ایران اسلامي جمهوریت د دریو چارواکو په حواله راپور ورکړی، چې علي خامنهای د دوشنبې په ورځ د ملي امنیت عالي شورا ته امر کړی، چې پر اسراییلو د برید لپاره چمتووالی ونیسي.
د دغو چارواکو په وینا، خامنهاي دا پریکړه د ایران د توغندیو د تولید ظرفیت، د تهران شاوخوا د هوايي دفاعي سیسټمونو، د انرژۍ مهمو زیربناوو او په سویل کې د یو لوی بندر په اړه د لوړ پوړو پوځي قوماندانانو د مفصل راپور له کتنې وروسته کړې ده.
نيويارک ټايمز د دغو دريو چارواکو په حواله ليکلي، چې خامنه اي ويلي دي، چې د اسرایيلو د بريدونو کچه او د تلفاتو شمېر چې لږ تر لږه څلور پوځيان دي، دومره لوړ دي چې له پامه نه شي غورځول کېدای او د دغو بريدونو په وړاندې د غبرګون نه ښودل به د ماتې د منلو په مانا وي.
د راپور له مخې، پوځي قوماندانان په اسراییلو کې دننه د لسګونو پوځي اهدافو نوملړ چمتو کوي، خو ښايي دا بریدونه د امریکا له ټاکنو وروسته ترسره شي، ځکه ایران اندېښمن دی چې په سیمه کې تازه کړکېچ او ګډوډي به ټاکنیز کمپاین کې د متحده ایالاتو پخوانی ولسمشر، ډونالډ ټرمپ ته ګټه ورسوي.
