د افغانستان د عدالت غوښتونکو مېرمنو غورځنګ وايي، چې د سیمې او نړۍ هیوادونه دې د ریچارډ بینیټ هغه غوښتنه ومني چې یوه اونۍ وړاندې یې کاناډا کې ويلي چې «طالبان دې د خپلو کړنو له امله نړۍوالې محکمې ته راکش شي.»
دوی وايي، د نړۍ نور هیوادونه دې هم د جرمني، کاناډا، هالنډ او استرالیا په څېر له هغه بهیر سره یو ځای شي چې ویلي یې و، طالبان دې د خپلو کړنو له امله د عدالت نړۍوالې محکمې ته راکاږل شي.
دغه غورځنګ د طالبانو د امربالمعروف د وزیر په هغې وروستیو څرګندونو هم نیوکې کړې چې ویلي و «د ښځو غږ خپله ښځو ته عورت دی.» او ویلي یې دي چې نړۍ دې د اندېښنو ښکارولو پر ځای د طالبانو د کړنو مخه ونیسي.
د عدالت غوښتونکو مېرمنو غورځنګ د ریچارډ بینیټ د هغې غوښتنې کلک ملاتړ کړی چې، له کاناډا یې غوښتي چې له طالبانو سره د خپلو اړیکو عادي کول دې د بشري حقونو د وضعیت په ښه کولو مشروط کړي.
دغه غورځنګ د ملګرو ملتونو د ځانګړي راپور ورکونکي ریچارډ بینیټ د هغې غوښتنې ملاتړ هم کړی چې وايي، نور هېوادونه دې هم د طالبانو د حساب ورکولو په بهیر کې له کاناډا او درېيو نورو هېوادونو سره يو ځاى شي.
ریچارډ بینیټ یوه اونۍ وړاندې کاناډا ته د خپل سفر پر مهال د افغانستان لپاره د کاناډا د فمینیسټانو ټولنې له مشرتابه او غړو سره کتلي وو، او په افغانستان کې یې د بشري حقونو د کړکېچ د څېړلو په اړه خبرې ورسره کړې وې.
د ملګرو ملتونو د بشري حقونو د عالي کمېشنرۍ دفتر د تلې په ۲۷ مه ویلي و چې: «ریچارډ بېنېټ به له هغو کسانو سره وګوري، چې په افغانستان کې د بشري حقونو د کړکېچ په هواري کې مرسته کولای شي او له افغانانو څخه د بشري حقونو د ملاتړ لپاره به له کاناډايي چارواکو سره هم خبرې وکړي.»
طالبانو افغانستان ته د ملګرو ملتونو د بشري حقونو د ځانګړي راپور ورکوونکي په ورتګ بندیز لګولی؛ خو ښاغلي بېنېټ ویلي، چې په افغانستان کې به د بشري حقونو د وضعیت په اړه خپل راپور ورکولو ته دوام ورکوي.
