خلیلزاد: که د امریکا د ټاکنو پایلې ژر روښانه نه شي په کور دننه او بهر به ناوړه اغیز ولري

نوموړي د یکشنبې په ورځ (د لړم ۱۳مه) پر اېکس خپور کړي پیغام کې لیکلي: «زه هیله لرم چې داسې ونه شي، ځکه چې دا به هم په کور دننه او هم په بهر کې ناوړه اغیز ولري.»
خلیلزاد د امریکا حکومت ته په اشارې سره همداراز وایي، چې نړۍ کې تر ټولو لویه ولسواکي باید وکولای شي، چې د ټاکنو په ورځ، ګټونکی اعلان کړي.
اوسمهال د امریکا د ټاکنو ترسره کېدو ته یوازې دوه ورځې پاتې دي او تر لا هم د متحده ایالاتو د ولسمشریزو ټاکنو د دوو نوماندانو کمالا هرېس او ډونالډ ټرمپ ترمنځ سختې ټاکنیزې سیالۍ روانې دي.
نن د دغو سیالیو لپاره هرېس میشیګن او ټرمپ بیا جورجیا، پنسلوانیا او د شمالي کارولینا ایالتونو اوسېدونکو ته ویناوې کوي.
متحده ایالات په نړۍواله کچه په سیاسي، اقتصادي او امنیتي چارو کې د لوی نفوذ له امله یو مهم ځواک دی.
د دغه هېواد د بهرنۍ پالیسۍ ټاکل او په پالیسیو کې د بدلون راوستل، نه یوازې په امریکا کې بلکې په ټوله نړۍ کې اغېز لري.
په ټوله کې د ډونالډ ټرمپ او کمالا هرېس د بهرنۍ پالیسۍ ترمنځ ستر توپیرونه لیدل کېږي.
ټرمپ په ملي ګټو او اقتصادي ځان بساینې ټینګار کاوه/ کوي او هڅه یې کوي، چې د امریکا نظامي او اقتصادي بوج کم کړي.
پر وړاندې یې هرېس بیا هڅه کوي، چې د امریکا نړۍوال اغېز بېرته پیاوړی کړي او د ډېپلوماسۍ له لارې د نړۍوالو مسایلو د حل لپاره همکارۍ ته ژمنتیا وښيي.