د امریکا د څارنوالانو ایتلاف د واک پر «سوله ییز لېږد» ټینګار کړی

د متحده ایالتونو د لویو څارنوالانو یو ۵۱ کسیز ایتلاف د واک د سوله ییز لېږد غوښتنه وکړه.دوی په یوه اعلامیه کې له خلکو غوښتي چې ارام واوسي.

یاد ایتلاف چې د امریکا د ټولو ایالتونو لوی څارنوالان پکې راټول شوي، د ټاکنو د پایلو په تړاو د هر ډول تاوتریخوالی غندنه کړې ده.

په دې اعلامیه کې چې نن سه شنبه خپره شوه، راغلي چې «د واک سوله ییز لېږد د قانون واکمنۍ تر ټولو ستر ثبوت دی؛ هغه دود چې زموږ د هیواد د ثباتزړه دی. د لویو څارنوالانو په توګه، موږ ژمن یو چې د خپلو ټولنو او هغو ډیموکراتیکو اصولو ساتنه وکړو چې موږ یې خدمت کوو."

یادو څارنوالانو له ټولو امریکایانو وغوښتل چې په ټاکنو او مدني خبرو اترو کې برخه واخلي او تر ټولو مهم د ولسواک بهیر یوموټیتوب ته درناوی وکړي.

د څارنوالانو دغه ایتلاف وايي، چې تاوتریخوالی په ولسواک بهیر کې ځای نه لري او دوی به د قانون پليتابه لپاره خپل واک وکاروي او له هر هغه غیر قانوني عمل سره به مقابله وکړي چې قانون ته ګواښ وي.