سي اېن اېن په یوه تحلیل کې لیکلي، چې د ټرمپ له بیا ټاکل کېدو سره ښايي اوکراین ډېر ژر له روسیې سره په جګړه کې د امریکا پام وړ ملاتړ وبایلي. د خپل ټاکنیز کمپاین پر مهال ټرمپ ویل، چې دی به په اوکراین فشار راوړي، چې له روسیې سره اوربند وکړي.
د خپل ټاکنیز کمپاین پر مهال ټرمپ ویل، چې دی به په اوکراین فشار راوړي، چې له روسیې سره اوربند وکړي
د ټرمپ بریا په داسې حال کې ده، چې روسي ځواکونه په ختیځ دونباس سیمه کې پرله پسې پرمختګ کوي، چې ولادیمیر پوتین پلان لري؛ څو دغه سيمه په بشپړه توګه د روسیې له خاورې سره یوځای کړي.
د اوکرایین لوی درستیز الکساندر سيرسکي د شنبې په ورځ په ټيلیګرام کې په يوه بیان کې وویل، چې په لومړۍ کرښه کې وضعیت «ډیر ستونزمن» دی او ځینې سیمې «د اوکرایني ځواکونو دوامداره نوي کولو ته اړتیا لري.»
په ورته وخت کې، روسیه د شمالي کوریا د تازه ځواکونو په مرسته د خپلو ځواکونو د پیاوړي کولو په حال کې ده.
امریکايي چارواکو ويلي، چې د شمالي کوریا شاوخوا ۱۰ زره سرتېري د روسیې په کورسک سیمه کې ځای پر ځای شوي او تمه ده، چې په راتلونکو ورځو کې د اوکراین پر ضد جګړې ته داخل شي.
د روسي ځواکونو دغه پرمختګ په داسې حال کې کېږي، چې اروپايي لوی هېوادونه او امریکا له روسیې سره په جګړه کې د اوکراین تر شا ولاړ دي.
د بایډن ادارې اوکرایین ته د وسلو او مالي مرستو په نوم لسګونه میلیارده ډالر ورکړي دي.
مخکي له دې چې ټرمپ اداره په لاس کې واخلي د بایډن اداره پلان لري، چې کییف ته د اعظمي ملاتړ چمتو کولو ته دوام ورکړي.
خو د بایډن برعکس ټرمپ په مکرر ډول د پوتین ستاینه کړې او په تکرار ډول یې د اوکراین په ولسمشر ولادیمیر زیلینسکي، چې د هغه سره پیچلي تاریخ لري نیوکې کړي دي.
