د پولنډ لومړي وزیر ډونلډ تاسک ویلي، چې د امریکا په ولسمشریزو ټاکنو کې د ډونالډ ټرمپ بریا به د اروپا امنیت ته جدي عواقب ولري، خو په دقیق ډول یې وړاندوینه نه شي کولای چې پایلې به یې څه وي.
هغه د اروپا په سرمشریزه کې د ګډون لپاره بوداپست ته له الوتنې مخکې یوې خبري غونډې ته وویل، چې د امریکا ټاکنې به د اروپا سیاست ته په ځانګړې توګه د امنیت په برخه کې جدي پایلې ولري.
هغه زیاته کړه: "دا مسله زموږ لپاره ډیره مهمه ده او زه غواړم ټینګار وکړم چې پولنډ ځانګړې ګټې لري."
تاسک وویل، چې نورو اروپایی مشرانو ته به د هغه اصلي پیغام "له امریکا سره د اړیکو پیاوړي کول" وي او زیاته یې کړه چې د ټرمپ د لومړۍ دورې پرمهال، کله چې هغه د اروپايي شورا مشر و، له نوموړي سره یې "ښه شخصي اړیکې" درلودې.
هغه ټرمپ د یو "سختګیره" شریک په توګه یاد کړ، چې په سیاست کې د دواړو متحدینو او دښمنانو سره په داسې چلند باور لري چې د وړاندوینې وړ نه وي.
