د تېر حکومت د سولې د مرکچي پلاوي مشر معصوم ستانکزی وایي، چې اوسمهال د نړۍ اسلامي او غیر اسلامي هېوادونه پر هغو لارو چارو بحث کوي، چې د ښځو پرواړندې تاوتریخوالي څنګه بند شي.
نوموړي دغه څرګندونې د ښځو پر وړاندې د تاوتریخوالي د له منځه وړلو د نړۍوالې ورځې په مناسبت کړي او زیاته کړې یې ده، چې طالبان باید له افغان مېرمنو سره توپیري او د جهالت د وخت چلند بند کړي.
د ستانکزي په خبره: «د اسلام له ظهور سره د ښځو پر وړاندې جاهلانه چلند بند شوی و او طالبان هم باید د افغان ښځو پروړاندې ناوړه چلند پایته ورسوي.»
د ښځو پر وړاندې د تاوتريخوالي د له منځه وړلو د نړۍوالې ورځ په مناسبت د بښنې نړۍوال سازمان یو ۱۶ ورځینی کمپاین هم په لاره اچولی، چې د نومبر له ۲۵مې پیل او د ډسمبر تر ۱۰ مې به چې د بشري حقونو ورځ ده، دوام وکړي.
یاد سازمان ويلي، چې د طالبانو تر واک لاندې افغانستان کې نجونې او مېرمنې له تبعیض او ناوړه چلند سره مخ دي.
دغه سازمان په خپل ۱۶ ورځینی کمپاین سره له نړۍوالې ټولنې غواړي، چې طالبان ځواب ویلو ته اړباسي.
دا په داسې حال کې ده، چې په افغانستان کې د ملګرو ملتونو ماموریت هم له ښځو سره د تاوتریخوالي د مخنیوي د نړۍوالې ورځې په مناسبت له طالبانو غوښتي، چې د ښځو او نجونو پر وړاندې د تاوتریخوالي د پای ته رسولو لپاره ګامونه واخلي.
یوناما زیاته کړې، چې طالبان باید د ښځو د حقونو او بنسټیزو ازادیو د کمزوري کولو سیستماتیک بهیر ودروي.
د نړۍ په ګوټ ګوټ کې افغانې معترضې ښځې په هېواد کې د ښځو د کړکېچن وضعیت په اړه د نړۍوالې ټولنې پر بې غورۍ نیوکه کوي او وایي، چې نړۍواله ټولنه باید د طالبانو پروړاندې خپله چوپتیا ماته کړي.
له ښځو سره د تاوتریخوالي د مخنیوي نړۍواله ورځ په داسې حال کې نمانځل کېږي، چې له تېرو څه باندې درېیو کلونو راهیسې طالبانو د ښځو او نجونو پر زده کړو او کارونو بندیزونه لګولي دي او له ټولو لومړنیو حقونو یې بې برخې کړي دي.
یادې ډلې په دې موده کې د افغان ښځو د محدودولو په موخه لسګونه فرمانونه صادر کړي دي او ان د ښځو غږ عورت ګڼي.
که څه هم د ښځو پروړاندې د طالبانو هر ګام له پراخو نړۍوالو غبرګونونو سره مخ دی، خو طالبان وایي، چې د شریعت پر اساس یې افغان مېرمنو ته ټول حقونه ورکړي دي.