د افغانستان د ازادۍ جبهې د شېلي، فرانسې، مکسیکو، اسپانیا، کاستاریکا او لوکزاملورګ هېوادونو له هغه ګامه چې د جرمونو نړۍوالې محکمې ته یې له ښځو سره د طالبانو د ظالمانه چلند قضیه سپارلې، هرکلی وکړ.
دغې جبهې د یوې خبرپاڼې په خپرولو سره لیکلي، چې طالبانو په تېرو درېیو کلونو کې د ظالمانه فرمانونو په صادرولو سره افغان مېرمنې له خپلو ټولو انساني حقونو محرومې کړې دي او جنسیتي توپیر رژیم یې په افغانستان کې حاکم کړی دی.
په خبرپاڼه کې راغلي، چې افغان مېرمنې د جمهوریت په ۲۰ کلنه موده کې په ټولو ټولنیزو، فرهنګي، سیاسي او اقتصادي برخو کې فعاله وې او په دې برخه کې یې ډېرې قربانۍ ورکړې دي.
د خبرپاڼې له مخې، واک ته د طالبانو له رسېدو وروسته افغان مېرمنو د خپلو انساني حقونو د ترلاسه کولو لپاره د هېواد دننه او بهر کې مبارزه کړې.
خبرپاڼه زیاتوي، د نړۍ چوپتا، بې غوري او له طالبانو سره د یوشمېر هېوادونو تعامل افغان مېرمنې څه نا څه نهیلې کړې دي.
خبرپاڼه وړاندې کاږي: «اوس د دې وخت رارسېدلې، چې نړۍواله محکمه د ښځو پر وړاندې د طالبانو ظالمانه چلند د جنسیتي توپیر او د بشریت ضد جنایت په نامه په رسمیت وپېژني او د افغانستان د ښځو د حقونو ټینګښت لپاره جدي اقدام وکړي.»
د خبرپاڼې په وروستۍ برخه کې راغلي، چې دغه جبهه د ښځو له مبارزو هر اړخیزه ملاتړ کوي.
